ԱՄՆ նախագահ Դոնալդ Թրամփը կարող է լրացուցիչ փոխզիջումների գնալ՝ Իրանի հետ համաձայնագիր կնքելու համար, հաղորդում է Politico-ն՝ հղում կատարելով իր աղբյուրներին։
Նշվում է, որ Թրամփի հայտարարությունը Իսրայելի և Լիբանանի միջև հրադադարի մասին վկայում է այն մասին, որ նա «ցանկանում է ավարտել պատերազմը» Իրանի դեմ։ Politico-ի հաղորդմամբ՝ դեռ վերջերս Սպիտակ տան ղեկավարը նշել էր, որ Լիբանանում ռազմական գործողությունների դադարեցումը չի ներառվել ԱՄՆ-ի և Իրանի միջև հրադադարի պայմանների մեջ՝ այդ հակամարտությունը անվանելով «առանձին բախում»։ Սակայն «Իսրայելի վարչապետ Բենիամին Նեթանյահուին դրդելով դադարեցնել հարվածները՝ Թրամփը վերացրել է այն գործոնը, որը կարող էր խափանել Իրանի հետ գործարքը»։
«Կարծում եմ՝ նա կգնա այլ փոխզիջումների, քանի որ իսկապես ցանկանում է վերջ դնել դրան»,- լրատվամիջոցը մեջբերում է Պարսից ծոցի երկրներից մեկի բարձրաստիճան պաշտոնյայի խոսքերը: Հաշվի առնելով, որ Իսլամաբադում Իրանի հետ ուղիղ բանակցությունները որևէ առաջընթաց չեն ապահովել, Թրամփը «կարող է ավելի զիջող լինել Իրանի առնվազն որոշ պահանջների նկատմամբ»,- նշում է Politico-ն:
