«Եթե ձեզ դուր է գալիս վերջին հինգ տարվա պառլամենտը, դուք գիտեք ինչ անել։ Վստահ եմ, որ ձեզ դուր չի գալիս, դրա համար էլ «Լուսավոր Հայաստանն» ընտրական գործընթացի մեջ մտել է իր հայտով»,-«Լուսավոր Հայաստան» կուսակցության համագումարում ունեցած իր ելույթում ասաց կուսակցության նախագահ Էդմոն Մարուքյանը։
Նրա խոսքով, իրենք չեն մտնելու «վարչապետական թեկնածուների գռզվռտոցի մեջ», քանի որ չեն կարող մարդկանց խաբել։ Քաղաքական գործիչը հիշեցնում է, որ ընտրությունների արդյունքում նախ խորհրդարան են ձևավորելու։
«Մարդիկ կան, որ ուզում են իրենց անվան դիմաց գրվի վարչապետի թեկնածու, մենք նման իղձերով չենք ապրում, կիրք է, կիրքը մենք չունենք։ Ասում ենք, ժողովուրդ ջան, խորհրդարան է ձևավորվելու, լինելու են պատգամավորներ, որոշեք՝ ինչ ձևի պատգամավորներ եք ուզում ունենալ, ըստ դրա, իշխանություն եք ունենալու»,-հայտարարեց Մարուքյանը։
Խոսելով իրենց ծրագրերի ու տեսլականի մասին՝ Մարուքյանն ասաց, կարևորում են Հայ առաքելական եկեղեցու դերը։
«Հայաստանի ներսում պայքար է գնում անդադար գործած կառույցի դեմ, որը հարվածում է պետականության, ինքնիշխանության հիմքերին։ Ամենազազրելին, մենք տեսանք, որ ՔՊ-ն ներկայացրել է ծրագիր, որտեղ դրույթ կա Հայ Առաքելական եկեղեցու առաջնորդի մասին, ասում է տվեք մեզ մանդատ, հենց դա ստանա, ասելու են, ժողովուրդը տվել է մեզ մանդատ Կաթողիկոսին հեռացնելու համար»,-ասաց Մարուքյանը։
Նրա համոզմամբ, երկրի շահերից է բխում, որ ՀՀ նախագահի պաշտոնը զբաղեցնի հոգևորական։
«Մեզ պետք էր ունենալ հեղինակություն ունեցող նախագահ, որ ինստիտուտին ուժ տար, հակակշռեր, փոխզսպեր, երկրում դադարեցվեր այս քաոսը, գզվռտոցը, անորմալությունները, որ մենք տեսնում ենք։ Մենք առաջարկել ենք ու առաջարկում են, որ ՀՀ նախագահի պաշտոնը զբաղեցնի մեր արքեպիսկոպոսներից մեկը՝ Միքայել արքեպիսկոպոս Աջապահյանը»,-ասաց Մարուքյանը՝ ավելացնելով, որ սա հնարավորություն է ընդդիմադիր դաշտի համախմբման համար։
