Վարչապետ Նիկոլ Փաշինյանը, ներկայացնելով «Քաղաքացիական պայմանագիր» կուսակցության նախընտրական ծրագիրը, շեշտել է, որ տարածաշրջանացման գործնականացման համար կարևորում է «3+3» ձևաչափի հետագա զարգացումը, և ՀՀ-ն նպաստելու է դրան։ Ձևաչափում ՌԴ ներգրավվածությունն այն կարևոր է դարձնում նաև ՀՀ–ՌԴ հարաբերությունների կառուցողական տրանսֆորմացիայի համար։
«ՀՀ-ն որդեգրել է նաև «Տարածաշրջանացում–2» հայեցակարգը՝ նկատի ունենալով Կենտրոնական Ասիայի ու Մերձավոր Արևելքի երկրները և Հնդկաստանը։ Նախորդող շրջանում այլ երկրների հետ հարաբերությունների զարգացմանը զուգահեռ էական էր նաև Սաուդյան Արաբիայի և Պակիստանի հետ դիվանագիտական հարաբերությունների հաստատումը: Այս ուղղությունը նոր ակտիվություն կստանա 2026-2031 թվականների ընթացքում»,- շեշտել է վարչապետը։
Նա հավելել է, որ նախորդող շրջանում Հայաստանը ռազմավարական գործընկերություն, երկխոսություն կամ օրակարգ է հաստատել ԱՄՆ-ի, Վրաստանի, Նիդեռլանդների, Չինաստանի, Մեծ Բրիտանիայի, Ղազախստանի, ԵՄ–ի, Գերմանիայի և Լյուքսեմբուրգի հետ։ Միևնույն ժամանակ ՌԴ-ի հետ հարաբերությունները գտնվում են կառուցողական տրանսֆորմացիայի փուլում․ Հայաստանը զարգացնելու է փոխշահավետ ու կառուցողական հարաբերություններ Ռուսաստանի Դաշնության հետ։
Նիկոլ Փաշինյանը հիշեցրել է, որ մինչև վերջերս Հայաստանը չուներ դիվանագիտական հարաբերություններ Սաուդյան Արաբիայի և Պակիստանի հետ. «Մենք հաստատեցինք դիվանագիտական հարաբերություններ այդ երկրների հետ, և, ըստ այդմ, նախընտրական ծրագրի այս կետն արձանագրում է նախ հավասարակշռված արտաքին քաղաքականության արդյունավետությունը։ Պետք է արձանագրել, որ խաղաղությունը մեծ հաշվով մեկնարկել է հավասարակշռված արտաքին քաղաքականության հայեցակարգը որդեգրելու պահից, երբ մենք այլ դիտանկյունից ենք նայել մեզ, մեր տարածաշրջանին ու աշխարհին, և այդ նոր դիտանկյունը բերել է կոնկրետ արդյունքների»,- նշել է վարչապետը։
