ԼՂ ԳԽ նախկին պատգամավոր, հրապարակախոս Վահրամ Աթանեսյանը «ֆեյսբուքի» իր էջում գրել է․
Սկզբունքային խնդիրը Նիկոլ Փաշինյանը սահմանել է. թող ընդդիմությունը ապացուցի, որ Հայաստան-Ադրբեջան նախաստորագրված պայմանագիրը հայկական կողմի «զիջումների արձանագրում է»,- բայց ընդդիմադիր ոչ մի քաղաքական ուժ այդ «ձեռնոցը» չի ընդունել եւ չի ընդունի: Փոխարենը երկրորդ նախագահ Ռոբերտ Քոչարյանը Հայաստան-Ադրբեջան հարաբերությունների համար այլ «օրինակ» չի գտել, քան՝ իսրայելա-պաղեստինյանը, որտեղ Հայաստանը «Պաղեստինն է», Իլհամ Ալիեւը՝ «Նաթանյահուն»:
Իշխանությունն ու նրա քարոզիչներն էլ իրենց հերթին Քոչարյանի այս «կոնցեպտուալ համեմատությունն» են անտեսում: Մինչդեռ այն բացահայտում է Հայաստանի ավելի քան քսանամյա «պաղեստինացման» ողբերգությունը:
Թեեւ այդ տարիներին մերձիշխանական քարոզչությունը Հայաստանը Հարավային Կովկասի «Իսրայել» էր տեսնում: Մենք, իրոք, դեռ շատ հեռու ենք քաղաքական խոսույթի ենթատեքստը տեսնելուց եւ գնահատելուց: Մերը դեռ «ո՞վ ավելի լավ կպահի մեզ»-ն է:
