«Արժեքահեն հոգևոր կյանք ունենալու խնդրի լուծման Հայաստանյայց Առաքելական Սուրբ Եկեղեցու բարենորոգումը կենսական անհրաժեշտություն է»,-ներկայացնելով «Քաղաքացիական պայմանագիր» կուսակցության նախընտրական ծրագիրը՝ ֆեյսբուքյան ուղիղ եթերում ասում է Նիկոլ Փաշինյանը։
Նա շարունակում է. «Վերջին տասնամյակներում Հայաստանյայց Առաքելական Սուրբ Եկեղեցու փաստացի ղեկավարության գործունեության հետևանքով հավատավոր հանրությունը մի մեծ մասով օտարվել է և շարունակում է օտարվել Հայաստանյայց Առաքելական Սուրբ Եկեղեցուց, ինչն այդ թվում հոգևոր անվտանգության խնդիր է, քանի որ դա հնարավորություն է ստեղծել, որ արտաքին ուժերը փորձեն Հայաստանյայց Առաքելական Սուրբ Եկեղեցին դարձնել Հայաստանի անկախության, ինքնիշխանության դեմ հիբրիդային պայքարի հենակետ»:
Փաշինյանը հայտարարում է, որ «Քաղաքացիական պայմանագիր» կուսակցությունը պաշտպանում է ՀԱԵ բարենորոգման օրակարգը և որդեգրում է հետևյալ ճանապարհային քարտեզը.
«ա. Հայաստանյայց Առաքելական Սուրբ Եկեղեցու փաստացի պետի հեռացում՝ հանսգտի կոչում
բ. սահմանված կարգով կաթողիկոսական տեղապահի ընտրություն.
գ. Հայաստանյայց Առաքելական Սուրբ Եկեղեցու կանոնադրության ընդունում. կանոնադրությամբ պետք է սահմանվեն ամրագրված սկզբունքների պահպանման, ֆինանսական թափանցիկության և հոգևորականների բարեվարքության ապահովման կառուցակարգերը.
դ. սահմանված կարգով Ամենայն Հայոց կաթողիկոսի ընտրություն:
«Քաղաքացիական պայմանագիր» կուսակցության ձևավորած խորհրդարանական մեծամասնությունը և կառավարությունը ձեռնամուխ կլինեն հոգևոր ծառայողներին սոցիալական երաշխիքների պետական համակարգում ներառելու:
Միևնույն ժամանակ, «Քաղաքացիական պայմանագիր» կուսակցությունը հարգում է բոլոր քաղաքացիների դավանանքի և կրոնական համոզմունքների ազատությունը ու վերահաստատում, որ ՀՀ-ն աշխարհիկ պետություն է, և որ Սահմանադրության համաձայն՝ կրոնական կազմակերպություններն անջատ են պետությունից:
ՀԱԵ-ի բարենորոգման օրակարգը ծառայում է եկեղեցին քաղաքականությունից դուրս բերելու միջոցով ՀՀ սահմանադրական կարգի լիարժեք վերականգնմանը»։
Փաշինյանը նշում է, որ ինքը եկեղեցին պետությունից անջատ լինելու լիարժեք կողմնակիցն է. «Եկեղեցին անջատ է պետությունից, բայց եկեղեցին չի կարող դուրս լինել պետությունից, ավելին՝ եկեղեցին չի կարող պետություն լինել պետության մեջ։ Շատ է խոսվում այն մասին, որ, օրինակ, բարենորոգման օրակարգն եկեղեցու դեմ է։ Ընդահակառակը, բարենորոգման օրակարգը հանուն եկեղեցու է»։
Նա նաև ասում է, որ եկեղեցին անջատ է պետությունից, բայց եկեղեցին պետք է գործի պետության մեջ և պետության սահմանած կանոններով։
«Հայաստանում գործում է համընդհանուր հայտարարագրման համակարագ, և այս համակարգից չեն կարող դուրս լինե հոգևոր ծառայողները։ Վաղուց ենք խոսել, որ եկեղեցին որոշակի առևտրային գործունեության և Հայաստանի օրենսդրությամբ սահմանված դեպքերում պետք է նաև հարկերի վճարի»,- ասում է Փաշինյանը։
