Ադրբեջանի և Ուկրաինայի միջև համագործակցությունն ունի շատ ամուր քաղաքական հիմք, Ուկրաինայի նախագահ Վոլոդիմիր Զելենսկիի հետ հանդիպմանն ասել է Ադրբեջանի նախագահ Իլհամ Ալիևը։
«Ադրբեջանն ու Ուկրաինան փոխադարձաբար աջակցում են և կշարունակեն աջակցել իրենց երկրների ինքնիշխանությանը և տարածքային ամբողջականությանը բոլոր միջազգային կազմակերպություններում», – ասել է նա։
Ալիևը և Զելենսկին մտքեր են փոխանակել ռազմատեխնիկական համագործակցության վերաբերյալ։
«Մենք մտքեր ենք փոխանակել ռազմատեխնիկական համագործակցության վերաբերյալ, և այստեղ նույնպես կան շատ խոստումնալից հեռանկարներ։ Եվ՛ Ադրբեջանը, և՛ Ուկրաինան զարգացնում են իրենց ռազմաարդյունաբերական համալիրները, և կան հիանալի հնարավորություններ համատեղ արտադրության, և՛ համատեղ արդյունաբերական արտադրության համար ընդհանրապես», – ասել է Ալիևը։
Զելենսկին իր հերթին շնորհակալություն է հայտնել Իլհամ Ալիևին․
«Էներգետիկայի ոլորտի վերաբերյալ, այս շատ դժվար ժամանակահատվածում մենք ստացանք 11 օգնության փաթեթ։ Մենք մեր երախտագիտությունն ենք հայտնում Ադրբեջանին այս օգնության համար։ Դուք օգնում եք մեր երեխաներին։ Մեր երեխաները գալիս են ճակատային շրջաններից։ Նրանք դժվարությունների են հանդիպել և տառապել են պատերազմից։ Այստեղ են ավելի քան 500 ուկրաինացի երեխաներ, և մենք շնորհակալ ենք ձեզ այս աջակցության համար», – ընդգծել է Ուկրաինայի նախագահը։
Զելենսկին նաև հայտարարել է, որ Ուկրաինան պատրաստ է եռակողմ բանակցություններ անցկացնել ԱՄՆ-ի և Ռուսաստանի հետ Ադրբեջանում։
