Սպիտակ տան թղթակիցների ամենամյա ընթրիքը խափանվել է հրաձգության միջադեպի պատճառով։ Դեպքի պահին դահլիճում գտնվել են նաև ԱՄՆ նախագահ Դոնալդ Թրամփը և առաջին տիկին Մելանիա Թրամփըը։ Կրակոցների ձայներից հետո Գաղտնի ծառայության աշխատակիցները նրանց արագորեն դուրս են բերել տարածքից, ինչպես նաև ապահով կերպով տարհանել են մի շարք բարձրաստիճան պաշտոնյաների։
Իրավապահ մարմինները հաստատել են, որ կրակոցներ են հնչել, և անվտանգության ուժերի ու կասկածյալի միջև տեղի է ունեցել փոխհրաձգություն։ Կասկածյալը՝ Կալիֆորնիայի բնակիչ 31-ամյա Քոուլ Թոմաս Ալենը, ձերբակալվել է։ Ըստ պաշտոնական տվյալների՝ նա զինված է եղել որսորդական հրացանով, ատրճանակով և մի քանի դանակներով։ ԱՄՆ Գաղտնի ծառայությունը նույնպես հաստատել է, որ տուժածներ չկան։
Կասկածյալին առաջադրվել են մեղադրանքներ՝ բռնության ընթացքում հրազենի կիրառման և դաշնային աշխատակիցների վրա վտանգավոր զենքով հարձակման համար։ Նրա պաշտոնական մեղադրանքը նախատեսվում է առաջադրել երկուշաբթի։ Դեպքի դրդապատճառը դեռևս հայտնի չէ։
Միջադեպից հետո նախագահ Թրամփը հայտարարել է, որ նման իրավիճակները միշտ ցնցող են։ Նա նաև նշել է, որ սկզբում ցանկացել է, որպեսզի միջոցառումը շարունակվի, սակայն անվտանգության նկատառումներով այն հետաձգվել է։ Նախատեսվում է այն անցկացնել ավելի ուշ ժամկետում։
