Հայաստանի ԳԽ և ԼՂՀ ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է․
«Ցեղասպանության 100-րդ տարելիցի հռչակագրի վերաբերյալ այս տեսակետի հեղինակը Հայաստանի առաջին նախագահ Լևոն Տեր-Պետրոսյանն է։ Նրա հեղինակային հոդվածը բացառիկ իրավունքով տպագրվել է «Չորրորդ իշխանություն» թերթում։
Եթե 1998 թվականից ի վեր Հայաստանի արտաքին քաղաքականության հիմքում դրված էր Հայոց ցեղասպանության միջազգային ճանաչման խնդիրը, որի դիմաց մեր երկիրն ստացավ հայ և թուրք պատմաբանների հանձնաժողով ստեղծելու պարտադրանքը, ապա «Ցեղասպանության 100-րդ տարելիցի հռչակագրի» ուժով արտաքին քաղաքականության հիմքում արդեն դրվում է պահանջատիրության հարցը։
Թե ինչպիսի հետևանքների կարող է հանգեցնել այս կտրուկ շրջադարձը, միայն Աստված գիտի, իսկ ներկա պահին ընդամենն ակնհայտ է, որ դա չափազանց կբարդացնի ու երկար ժամանակով կսառեցնի հայ-թուրքական հարաբերությունների կարգավորման՝ Հայաստանի ապագայի համար խիստ անհրաժեշտ գործընթացը։
Մի խոսքով՝ հրապարակ է հանվել քաղաքական առումով եթե ոչ անպայման վտանգավոր, ապա առնվազն անպտուղ մի փաստաթուղթ, որն ամենևին պատշաճ չէ 100-ամյակի առթիվ Հայոց ցեղասպանության հարցը միջազգային ասպարեզում ըստ էության արծարծելու անհրաժեշտ նպատակադրությանը։
Մինչդեռ, եթե Ցեղասպանության խնդիրը դիտվեր բացառապես մարդու իրավունքների, մարդկության դեմ գործված հանցագործության և հայ-թուրքական հաշտեցման անհրաժեշտության համատեքստում, ապա հռչակագիրը կարող էր ոչ միայն համաշխարհային լայն արձագանքի արժանանալ, այլև դրական քաղաքական հետևանքներ ունենալ թե՛ Հայաստանի, թե՛ Լեռնային Ղարաբաղի համար»։
