«Այսօր՝ Հայաստանի անկախությունից ի վեր առաջին անգամ, Հայաստանի բոլոր սահմանային անցման կետերը վերահսկվում են և այնտեղ ծառայություն իրականացվում է Հայաստանի սահմանապահ զորքերի կողմից»,- Ազգային անվտանգության ծառայության սահմանապահ զորքերի կազմավորման օրվա առթիվ կազմակերպված միջոցառմանն ունեցած ելույթում ասաց Նիկոլ Փաշինյանը։
Նա հայտարարեց նաև, որ Հայաստանը Ադրբեջանի հետ ունի սահմանազատված և սահմանագծված 12 կիլոմետրանոց սահմանային հատված, որտեղ ծառայություն են իրականացնում ՀՀ սահմանապահ զորքերը։
«Այդ 12 կիլոմետրը՝ Հայաստանի և Ադրբեջանի սահմանի թերևս միակ հատվածն է, որտեղ Հայաստանի և Ադրբեջանի Զինված ուժերի ներկայացուցիչները ծառայություն են իրականացնում առանց սաղավարտների, զրահաբաճկոնների, ինքնաձիգների պահունակները պայուսակների եջ դրած»,- ասաց Փաշինյանը։
Նա հայտարարեց, որ առաջիկայում կշարունակեն ու տրամաբանական ժամկետներում ավարտին կհասցնեն Հայաստանի և Ադրբեջանի միջև սահմանի սահմանազատումը։
«Մենք օրակարգում ունենք նաև Վրաստանի հետ մեր սահմանի սահմանազատման ամփոփման օրակարգը, վրաց գործընկերների հետ այս մասին արդեն պայմանավորվածություններ ունենք։
Սրանով Հայաստանի սահմանների սահմանազատումն ու սահմանագծումը կամփոփվի, և մեր պետությունն իր միջազգայնորեն ճանաչված տարածքում ավելի վստահ ձևով զարգացման օրակարգի վրա կենտրոնանալու հնարավորություն կունենա»,- ասաց Փաշինյանը։
