«Մենք հիմա մարզադահլիճներում լոգարաններ և ցնցուղներ ենք ներառում, որպեսզի երեխաները ֆիզկուլտուրայից հետո, սպորտով զբաղվելուց հետո օգտագործեն»,- այս մասին Գիտությունների Ազգային ակադեմիայում գիտնականների հետ հանդիպման ժամանակ ասաց Նիկոլ Փաշինյանը:
Նա նշեց, որ տասնյակ դպրոցներում, որտեղ այդ ցնցուղները կամ լաբորատոր սարքերը կան, կամ չեն օգտագործվում, կամ բավարար չափով չեն օգտագործվում. «Սկզբնական շրջանում ես դրանից շատ սրտնեղում էի, նյարդայնանում, բայց հետո հասկացա, որ իրավիճակին պետք է ավելի ամբողջական մոտենանք: Ի վերջո, մենք բոլորս ապրել ենք մի կյանքի շրջափուլով, որտեղ այդ լաբորատորիաները, ցնցուղները չեն եղել, դրա համար պետք է առանձնահատուկ միջոցներ կիրառենք»։
«Մեր փորձը ցույց է տալիս, որ առանց առաջնորդության չի լինում, առաջնորդել՝ չի նշանակում պարտադիր ունենալ բարձր պաշտոն։ Կարող է մի տեղում այդ առաջնորդությունը ստանձնել աշակերտը, մյուս դեպքում ուսուցիչը, երրորդ դեպքում ծնողը, ծնողների խումբը»,- ասաց Փաշինյանը։
Նա նաև հայտարարեց, որ 2017 թվականի համեմատ 2025 թվականի արձանագրած արդյունքներով գիտության ֆինանսավորումը ավելացրել են շուրջ 2,8 անգամ՝ 185 տոկոսով:
«Պետք է խոստովանեմ՝ ելույթներում իմ ականջը ծակում է, երբ որ ասում են՝ կառավարությունն աջակցում է գիտությանը։ Մենք գիտությանը չենք աջակցում, գիտության զարգացումը մեր քաղաքականությունն է»,- ասաց Ն.Փաշինյանը։
