«Սա հակաեվրոպական ակցիա չէ, մենք երբեք նեգատիվ հայացքով չենք նայել մեր եվրոպացի գործընկերներին, բայց նրանք պետք է հասկանան թե ուր են գալիս»,- Հայաստանում ԵՄ ներկայացուցչության դիմաց ասաց Բարգավաճ Հայաստան կուսակցության անդամ Արման Աբովյանը։
ԵՄ քաղաքական միավորումների անդամ ՀՀ 6 կուսակցություն միասնական նամակ էին հանձնում Եվրամիության ներկայացուցչությանը՝ ԵՄ քաղաքական համայնքի կոնֆերանսին ընդառաջ բարձրաձայնելով Հայաստանում ժողովրդավարության ոտնահարման բազմաթիվ դեպքերի և Բաքվի բանտերում ապօրինաբար պահվող հայ ռազմագերիների վերաբերյալ։
«Ժողովրդավարության բաստիոն կոչված Հայաստանը դառնում է հակաժողովրդավարական ՔԿՀ-ի»,-Հայաստանի իրավիճակը ներկայացրեց Արման Աբովյանը։
Նրա խոսքով՝ եվրոպացի լիդերները պետք է շատ հստակ հասկանան, որ Հայաստանում լուրջ խնդիրներ կան ժողովրդավարության հետ և այն տեսլականի առումով, որը Աշխարհի և Եվրոպայի համար առաջընթացի ցուցանիշ է։
Ըստ Աբովյանի, բոլորին է հայտնի, թե Հայաստանում ինչ բռնաճնշումներ են իրականացվում, ինպիսի իրավիճակ է ստեղծվել, երբ քաղաքական հայացքների, սոցցանցերում գրառման կամ ինչ-որ գրառմանը հավանություն տալու համար մարդկանց աշխատանքից հեռացնում են։
«Այս ամենը պետք է հասցվի մեր եվրոպացի գործընկերներին, մի շատ պարզ պատճառով, իրենք տիրապետում են այդ ինֆորմացիային, բայց իրենք նաև պետք է իմանան, որ ՀՀ-ի քաղաքացիները հաշտ չեն այն իրավիճակի հետ, որը ձևավորվել է այսօր Հայաստանում»,-ասաց ԲՀԿ անդամը։
Նա նաև նկատեց, որ ՀՀ գործող իշխանությունները դադարում են պաշտպանել հայկական շահերը և ամբողջովին տեղավորվում են ադրբեջանական հակահայ քաղաքականության մեջ։
