ՄԱԳԱՏԷ-ի ղեկավար Ռաֆայել Գրոսին Associated Press-ին տված հարցազրույցում հայտարարել է, որ Իրանի բարձր հարստացված ուրանի պաշարների մեծ մասը, հավանաբար, շարունակում է մնալ Սպահանի միջուկային համալիրում։
Այս տարածքը նախորդ տարի և 2026-ի ընթացիկ պատերազմի ժամանակ ենթարկվել է ամերիկա-իսրայելական օդային հարվածների, ինչի պատճառով ՄԱԳԱՏԷ-ի տեսուչները 2025-ի հունիսից զրկված են օբյեկտ մուտք գործելու հնարավորությունից։
Գործակալության տվյալներով՝ Սպահանի ստորգետնյա թունելներում պահվում է շուրջ 200 կգ մինչև 60% հարստացված ուրան։ Ընդհանուր առմամբ, Իրանն ունի 440,9 կգ նմանատիպ պաշար, ինչը տեխնիկապես շատ մոտ է զենքի համար անհրաժեշտ 90% մակարդակին։
Արբանյակային լուսանկարները ցույց են տալիս, որ 2025-ի պատերազմից անմիջապես առաջ կոնտեյներներով բեռնված մեքենաները մտել են Սպահանի թունելներ, և ՄԱԳԱՏԷ-ն ենթադրում է, որ նյութը դեռ այնտեղ է, սակայն չի կարողանում ստուգել ամբողջականությունը։
Գրոսին ընդգծել է, որ Իրանը, որպես Միջուկային զենքի չտարածման պայմանագրի կողմ, պարտավոր է բացել իր օբյեկտները տեսչական ստուգումների համար։ Սպահանից բացի, գործակալությունը մտադիր է ստուգումներ անցկացնել նաև Նաթանզի և Ֆորդոյի միջուկային կենտրոններում՝ պարզելու միջուկային նյութերի իրական կարգավիճակը։
