Եվրոպական միությունը չի ընտրում հաղթողներին։ Մենք համագործակցելու ենք այն կառավարության հետ, որը կձևավորվի Հայաստանի քաղաքացիների ընտրության արդյունքում՝ առաջնորդվելով նույն սկզբունքներով և նույն օրակարգով։
Արմենպրեսի հետ հարցազրույցում ասել է ՀՀ-ում ԵՄ դեսպան Վասիլիս Մարագոսը։
– Այս կարևոր համաշխարհային նշանակություն ունեցող իրադարձություններից անմիջապես հետո Հայաստանը կմտնի խորհրդարանական ընտրությունների նախընտրական փուլ։ Այս համատեքստում, ո՞րն է հիմնական ուղերձը, որը դուք կցանկանայիք փոխանցել Հայաստանի քաղաքացիներին։
– Հունիսին կայանալիք խորհրդարանական ընտրությունները կարևոր հանգրվան են, և իմ ուղերձը Հայաստանի քաղաքացիներին հստակ է․ այս ընտրությունները ձերն են։ Հայաստանի ապագան որոշելու իրավունքը պատկանում է ընտրողներին՝ ազատ և առանց միջամտության, իսկ Եվրոպական միության դերը՝ Հայաստանի իշխանությունների դիմումի հիման վրա, աջակցելն է, որպեսզի այդ գործընթացը լիարժեքորեն ապահովվի:
Գործնականում մենք աջակցում ենք այն ինստիտուտներին, որոնք ապահովում են ազատ և արդար ընտրությունների անցկացումը՝ սկսած Կենտրոնական ընտրական հանձնաժողովից մինչև քաղաքացիական հասարակության կազմակերպություններ և անկախ մեդիա։ Սա երկարաժամկետ քաղաքացիական առաքելություն է, որը համագործակցում է հաստատությունների հետ և չի հանդիսանում ո՛չ ընտրությունների դիտորդական առաքելություն, ո՛չ էլ ընտրական գործընթացի մասնակից: Մեր աջակցության նպատակը Հայաստանի ինքնիշխանության պաշտպանությունն է՝ ապահովելու, որ հունիսի 7-ին Հայաստանի ապագան որոշեն բացառապես Հայաստանի քաղաքացիները և ոչ ոք այլ։ Միաժամանակ ցանկանում ենք հստակ ընդգծել, որ այս աջակցությունը որևէ կերպ կապված չէ որևէ քաղաքական ուժի կամ թեկնածուի հետ
Եվրոպական միությունը չի ընտրում հաղթողներին։ Մենք համագործակցելու ենք այն կառավարության հետ, որը կձևավորվի Հայաստանի քաղաքացիների ընտրության արդյունքում՝ առաջնորդվելով նույն սկզբունքներով և նույն օրակարգով։ Թե ով կհաղթի, բացառապես Հայաստանի ընտրողների որոշելիքն է, և ես խրախուսում եմ բոլորին օգտվել իրենց այդ իրավունքից՝ չտրվելով ապատեղեկատվական այն նարատիվներին, թե Հայաստանի քաղաքացիները որոշման մեջ դեր չունեն․ իրականում որոշումը պատկանում է միայն և միայն նրանց:
Մեզ համար կարևոր է, որ գործընթացը լինի արժանահավատ, որ քաղաքացիները կարողանան ազատորեն կատարել իրենց ընտրությունը, և որ արդյունքներն արտացոլեն հայ ժողովրդի իրական կամքը։ Ահա թե ինչ են նշանակում ժողովրդավարական ընտրությունները, և դա է, ինչին Հայաստանն արժանի է։
Ավելին՝ սկզբնաղբյուր կայքում։
