BBC-ի ռուսական ծառայությունը գրում է, որ Եվրոպական առաջնորդները հավաքվում են Երևանում՝ մասնակցելու երկու աննախադեպ գագաթնաժողովների, ինչը խորհրդանշական մեծ նշանակություն ունի մի երկրի համար, որը երկար ժամանակ համարվում էր Ռուսաստանի ամենամոտ դաշնակիցը Հարավային Կովկասում։
Հոդվածում նշվում է, որ չնայած Հայաստանի անդամակցությանը Եվրասիական տնտեսական միությանը և երկրի տարածքում ռուսական ռազմաբազայի առկայությանը, Երևանն այսօր հյուրընկալում է ավելի քան 30 եվրոպական առաջնորդների և Կանադայի վարչապետին։ Հոդվածում նշվում է, որ այս շրջադարձի հիմնական պատճառը 2023 թվականին Ադրբեջանի իրականացրած ռազմական գործողությունն է եղել Լեռնային Ղարաբաղում, որի ժամանակ ռուս խաղաղապահները մնացել են անգործ, իսկ ՀԱՊԿ-ը չի արձագանքել Հայաստանի տարածք ներխուժումներին։
Հոդվածի հեղինակն ընդգծում է, որ Մոսկվան ակնհայտ գրգռվածությամբ է հետևում Հայաստան-ԵՄ մերձեցմանը։ Ռուսաստանի նախագահ Վլադիմիր Պուտինը նախազգուշացրել է, որ ԵՄ-ին անդամակցելու ձգտումը անհամատեղելի է ԵԱՏՄ-ին անդամակցության հետ։ Բացի այդ, Ռուսաստանն արդեն կիրառում է «հիբրիդային սպառնալիքներ»՝ սկսած հայկական հանքային ջրերի ներկրման արգելքից մինչև զանգվածային կիբերհարձակումներ պետական պաշտոնյաների և քաղաքացիների դեմ։
Վերջում նշվում է, որ թեև Եվրոպան խոստանում է վիզաների ազատականացում և աջակցություն դեզինֆորմացիայի դեմ պայքարում, Հայաստանի համար դեռևս հստակեցված չեն ԵՄ անդամակցության ժամկետները կամ ռուսական գազին փոխարինելու պլանները, ինչը նշանակում է, որ երկրի «բալանսավորումը» Ռուսաստանի և Արևմուտքի միջև դեռ հեռու է ավարտված լինելուց։
