Մերձավոր Արևելքում ստեղծված իրավիճակը և Հորմուզի նեղուցի փակման բացասական ազդեցությունը արևմտյան երկրների վրա կլինեն Երևանում կայանալիք Եվրոպական քաղաքական համայնքի (ԵՔՀ) գագաթնաժողովում քննարկման թեմա։
Մեծ Բրիտանիայի վարչապետ Քիր Սթարմերի գրասենյակը հայտարարել է, որ Երևանում նա իր գործընկերների հետ կքննարկի, թե ինչպես կարող են պետությունները լավագույնս նպաստել նեղուցի երկարաժամկետ անվտանգությանը, կանխել աճող ծախսերը և ապահովել տնտեսական կայունությունը։
Դաունինգ սթրիթը նշել է, որ այս քննարկումները կհիմնվեն ապրիլի կեսերին Փարիզում Հորմուզի նեղուցում նավագնացությանը նվիրված համաժողովում կայացած քննարկումների վրա, որում որոշվել է, որ Միացյալ Թագավորությունը և Ֆրանսիան կգլխավորեն բազմազգ առաքելությունը։
