Ուկրաինայի նախագահ Վլադիմիր Զելենսկին Երևանում ընթացող Եվրոպական քաղաքական համայնքի գագաթնաժողովի շրջանակում հանդիպել է ՀՀ վարչապետ Նիկոլ Փաշինյանի հետ՝ ընդգծելով, որ սա վերջին 24 տարվա ընթացքում Ուկրաինայի նախագահի առաջին այցն է Հայաստան։ Կողմերը քննարկել են տարածաշրջանային իրավիճակը, անվտանգային մարտահրավերներն ու իրական խաղաղության հասնելուն ուղղված դիվանագիտական ջանքերը։
Անդրադառնալով տնտեսական գործընկերությանը՝ Զելենսկին առաջարկել է վերսկսել տնտեսական համագործակցության հարցերով համատեղ միջկառավարական հանձնաժողովի աշխատանքները և հաջորդ նիստն անցկացնել այս տարի Կիևում։
«Կարևոր է, որ մենք վերականգնում ենք ակտիվ երկխոսությունը մեր երկրների միջև»։ Նա նաև շնորհակալություն է հայտնել վարչապետ Փաշինյանին գագաթնաժողովին մասնակցելու հրավերի համար՝ հավելելով, որ այս հանդիպումը լավ հնարավորություն էր քննարկելու զարգացման նոր հեռանկարները։
