Եվրոպական հանձնաժողովի նախագահ Ուրսուլա ֆոն դեր Լեյենը վարչապետ Նիկոլ Փաշինյանի հետ ընդլայնված կազմով հանդիպման ընթացքում ասել է, որ միշտ էլ հատուկ կապ է գոյություն ունեցել Հայաստանի և Եվրոպայի միջև։
«Մեր կապերը սերում են առասպելներից և հինավուրց քաղաքակրթություններից։ Մեզ միավորում են նաև հնարավորությունները։ Հայաստանը և ԵՄ-ն ավելի մոտ են, քան երբևէ» ,- ասել է Եվրոպական հանձնաժողովի նախագահը՝ հավելելով, որ լավ առաջընթաց են արձանագրում առանց վիզայի ռեժիմի շուրջ երկխոսության և ներդրումային հոսքերի ապահովման հարցում։
«2,5 մլրդ եվրո արդեն իսկ նախատեսված է մեր ներդրումային ծրագրում՝ «Գլոբալ գեթվեյ» նախագծի շրջանակներում։ Այս գագաթնաժողովով մենք նոր մակարդակ ենք թևակոխում»,- շեշտել է նա։
Նրա խոսքով՝ Հայաստանն իսկապես ապահովում է ամենակարճ երթուղին Եվրոպայից դեպի Կենտրոնական Ասիա և Կասպից ծով․ «Նախկինում պատերազմի և աշխարհաքաղաքական նկատառումներով այդ երթուղին փակ էր, այժմ դուք դա փոխում եք՝ շնորհիվ ձեր խիզախ ընտրության՝ հանուն խաղաղության և եվրոպական ցանցին ավելի մեծ ինտեգրման»,- ընդգծել է Ուրսուլա ֆոն դեր Լեյենը։
