Վրաստանի նախկին նախագահ Միխեիլ Սաակաշվիլին հայտարարել է, որ Բիձինա Իվանիշվիլիի կառավարման հետևանքով երկիրը կորցրել է Կովկասի պատմական կենտրոնի և եվրաինտեգրման առաջամարտիկի իր դիրքերը։ Նրա խոսքով՝ այժմ տեղի է ունեցել դերերի փոխանակում, որտեղ Վրաստանը նահանջել է դեպի անցյալ, իսկ Հայաստանը գրանցել է լուրջ առաջընթաց։
Անդրադառնալով տարածաշրջանային զարգացումներին՝ Սաակաշվիլին մասնավորապես նշել է.
«Հիմա Վրաստանը գտնվում է 2013 թվականի Հայաստանի վիճակում, իսկ Հայաստանն առաջ է անցել՝ հասնելով մինչև 2012 թվականի Վրաստանի կարգավիճակին։ Ֆրանսիական «Արևա» ընկերության հետ ատոմակայան կառուցելու նախագիծը, որի շուրջ մենք սկզբունքային պայմանավորվածություն ունեինք, այսօր Հայաստանը մեզնից «վերցրել է», ինչպես և եվրոպական այլ բարիքներ»։
Նախկին նախագահը հավելել է, որ 50 եվրոպական առաջնորդների այցը Երևան՝ Թբիլիսիի վրայով անցնելով, այն գինն է, որը վրաց ժողովուրդը վճարում է ներկայիս իշխանության վարած քաղաքականության համար։
