Երևանի քաղաքապետի խորհրդական Սոնա Թևանյանը խոսել է «Կասկադ» համալիրի վերակառուցման մասին։
«Այս պահին ունենք հետևյալ իրավիճակը. հիշեցնեմ, որ ծրագիրը բաղկացած է երկու բաղադրիչից՝ Կասկադի անավարտ հատվածի վերակառուցումից, որտեղ պետք է լինի մշակութային կենտրոնը («Ա1» գոտու կառուցապատման աշխատանքներ), և հարակից հատվածում բազմաֆունկցիոնալ համալիրի կառուցապատումից («Բ» գոտի), որը ևս բաժանված է երեք բաղադրիչի»,- նշել է Սոնա Թևանյանը՝ հավելելով, որ դրանք «Բ1», «Բ2» և «Բ3» գոտիներն են։
Նրա խոսքով՝ այդ բաժանումը պայմանավորված է նրանով, որ բոլոր դեպքերում կան իրականացվելու տարբեր գործընթացներ. «Դրանց իրավական լուծումները բավականին տարբեր են։ «Բ1»-ի և «Բ2»-ի հարցում արդեն ունեինք համայնքային հողամասի օտարման վերաբերյալ կնքված պայմանագիր ձեռքբերողի հետ, և մնացել էր «Բ3» գոտու նկատմամբ հանրության գերակա շահ ճանաչելու մասին որոշման ընդունումը, որը մրցույթի նախապայմաններից էր»,- շեշտել է նա՝ հավելելով, որ կառավարության կողմից որոշումն արդեն ընդունվել է ապրիլի 23-ին։
«Ինչ վերաբերում է «Ա1»-ին, ապա այս մասով ունենք տրամադրված ճարտարապետահատակագծային առաջադրանք, և ֆրանսիացի ճարտարապետների թիմը մեկնարկել է նախագծի մշակման աշխատանքները»,- շեշտել է Սոնա Թևանյանը՝ հավելելով, որ «Բ1» և «Բ2» գոտիների ճարտարապետահատակագծային առաջադրանքի տրամադրումը տեղի կունենա այս ամսվա ընթացքում։ «Այստեղ ներդրող կողմն ունի վճարման ենթակա գումար, որը մոտ 300 մլն դրամ է կազմելու միայն ճարտարապետահատակագծային առաջադրանքի համար»,- ասել է նա։
