Այո, ունենք մեծ հայկական սփյուռք և կարեւոր գործ է դա, այո, մեր հայրենակիցներն են, բայց բոլորս պետք է հասկանանք՝ նրանք տարբեր երկրների քաղաքացիներ են ու նրանց տեսակետները ուղղակիորեն կարող են չհամընկնել այլ երկրներում բնակվող հայերի հետ։ Սփյուռքահայերի կարծիքները գուցե չհամընկնեն ՀՀ քաղաքացի հայերի կարիքների ու շահերի հետաքրքրությունների հետ։ Այն հայերը, որոնք բնակվում են այստեղ՝ Հայաստանում։ Այս մասին ՀՀ ԱԳ նախարարն ասաց «Երեւանյան երկխոսություն» համաժողովի ընթացքում։
«Մենք պետք է հասկանանք՝ սփյուռքի մի զգալի հատված՝ Հայոց ցեղասպանության վերապրողների սերունդներն են, ուստի նրանցից շատերը ուզում են տեսնել ավելի մեծ Հայաստան, պատմական Հայաստան, մի Հայաստան, որ գոյություն ուներ, իր փառահեղ անցյալն է ունեցել, հարուստ անցյալ, բայց այսօր դա արդեն երազ է. դա իրական Հայաստանը չէ։ Մենք ՀՀ-ում ապրում ենք այս հստակ տարածաշրջանում, այս հարեւաններով և չենք ուզում հաջորդ տասնամյակը, դարը կամ հազարամյակը ապրել կռվելով հարեւանների հետ»,- նշեց նա։
