Երևանի քաղաքապետ Տիգրան Ավինյանն ավագանու նիստում նշել է, որ «Մայր Հայաստան» դաշինքի անդամները հանգրվանել են Գագիկ Ծառուկյանի ԲՀԿ-ի և «Հայաստան» դաշինքի ցուցակներում։
«Եվ այս մարդիկ խոսում են կոռուպցիայից, մեր աշխարհաքաղաքական խնդիրներից։ Երևանում մի քանի օր առաջ անցկացվել է Եվրոպական համաժողովը։ Հայ ազգի պատմության մեջ նմանատիպ միջոցառում Հայաստանում տեղի չի ունեցել։ Տիգրան Մեծի ժամանակ անգամ նման բան տեղի չի ունեցել»,- ասել է քաղաքապետը՝ ընդգծելով, որ երկու օր շարունակ աշխարհի ուղիղ կեսը կենտրոնացած էր Երևանում։ «Եվ մենք լսում ենք քննադատություն դրա վերաբերյալ»,- հավելել է նա։
Քաղաքապետն ընդգծել է, որ մի բանի համար է շատ ուրախ. «Որ դուք կարողանում եք խոսել։ Մենք ստեղծել ենք այդ հնարավորությունը ձեզ համար. ինչ ասես, ինչ ուզես կարող եք խոսել՝ սուտ թե ճիշտ, որի համար ձեզ բան չի լինի։ Քանի որ այն ցուցակներում, որտեղ դուք կաք, այդ իշխանությունների օրոք ձեզ շքամուտքերում («պադիեզդներում») քացու տակ էին առել»,- ասել է Տիգրան Ավինյանը՝ հավելելով, որ շնորհավորում է նրանց այժմ այդպիսի Հայաստանի Հանրապետություն ունենալու առիթով։
