«Ութ տարի առաջ այս օրը այս շենքում Հայաստանի վարչապետ ընտրվեց այսօրվա վարչապետը։ Այս 8 տարիներին մեր երկիրն է փոքրացել»,- ԱԺ մոտ քարոզարշավի մեկնարկին լրագրողների հետ զրույցում ասաց «Ուժեղ Հայաստան» կուսակցության խորհրդի անդամ Նարեկ Կարապետյանը։
Նա նշեց, որ Նիկոլ Փաշինյանը ժողովրդի գրեթե միաձայն աջակցությամբ դարձավ վարչապետ այն հույսով, որ բարեկեցություն, խաղաղություն է բերելու Հայաստանին և Արցախին։
«8 տարվա ընթացքում նա մեզ խոստացել էր, որ երկիրն ունենալու է արդար դատական համակարգ, երկիրը լինելու է բարեկեցիկ, մարդիկ ապրելու են լավ, խոստացել էր բոլոր գյուղացիներին, որ իրենց գյուղերում լավ ապրելու հնարավորություն կունենան, որ չլքեն գյուղերը։ Նրանց խոստումները հարյուրավոր են։
Խաղաղություն խոսք տալով՝ բերել են երեք պատերազմ, բարեկեցություն խոսք տալով՝ ամեն ընտանիքի վրա 10 հազար դոլար վարկ են վերցրել, հարկերը փոքր բիզնեսի համար բազմապատկել են երկուսով, ախոստացան՝ հաղթահարել ծայրահեղ աղքատությունը, չհաղթահարվեց, բայց իրենք իրենց այս ընթացքում միլիարդավոր պարգևավճարներ բաժանեցին»,- ասաց Նարեկ Կաքրապետյանը։
Ի՞նչ է առաջարկում «Ուժեղ Հայաստանը»
Նարեկ Կարապետյանն ասաց, որ առաջին իսկ օրվանից 3-4 ամսվա ընթացքում մի քանի ծրագիր են իրականացնելու։ Նա հիշեցրեց ծայրահեղ աղքատության ծրագիրը՝ 150 հազար դրամ յուրաքանչյուր 5 հոգանոց ընտանիքին, որ ծայրահեղ աղքատ է։
«Այդ գումարների 70 տոկոսը տալու են աշխարհի հարուստ հայ գործարարները, 30 տոկոսը մասնակցելու է պետությունը։
Ոչ ոք Հայաստանում չի կարող նման ծրագիր անել, քանի որ ոչ մի համաշխարհային հայկական կապիտալի տեր, հայկական սփյուռքի մեծ գործարար այս իշխանության կոչով չի անի նման բան։ Գրեթե բոլոր հայ մեծ գործարարները մեր ընկերներն են»։
Նա կոչով դիմեց ընդդիմադիր հայացքով հայրենակիցներին. «Մտել ենք այս պայքարի մեջ, մինչև վերջ պայքարելու ենք՝ մասնակցեք, աջակցեք, միասին փոփոխություն բերենք, այս մարդկանց ճանապարհել է պետք։
Մենք վերադառնալու եք այստեղ 1,5 ամսից, սկսելու ենք մեր երկրի վերակառուցումը»։
