«Հաղթանակի օրը մեր ազգի համար շատ կարևոր է։ Դժվարությամբ, անգամ երբեմն հույսի վերջին կաթիլը պահելով՝ հասել ենք հաղթանակի, հաղթել ենք ֆաշիզմին՝ ամբողջ աշխարհի համար մեծ վտանգ էր, և ձեռք ենք բերել ինքնիշխան մեր երկրում ապրելու իրավունք»,-«Հաղթանակ» զբոսայգում լրագրողների հետ զրույցում ասաց «Ուժեղ Հայաստան» կուսակցության խորհրդի անդամ, նախընտրական ցուցակը գլխավորող Նարեկ Կարապետյանը։
Նա Հայրենական մեծ պատերազմում զոհված հերոսների հիշատակը հարգելու էր եկել թիմակիցների հետ։ Նա վստահ է, որ հայ ժողովուրդը դեռ նոր հաղթանակներ ունենալու է։
«Եթե լավ աշխատենք, ճիշտ զարգացնենք մեր երկիրը, կունենանք հաղթանակներ։ Այսօր ուզում են հայ և հաղթանակ բառերը իրարից հեռվացնել, մեր մեջ ուզում են նստեցնել, որ մենք չենք կարող ունենալ հաղթանակ։ Կարո՛ղ ենք։ Բայց ապագա հաղթանակները կլինեն աշխատանքային հաղթանակներ։ Բարեկեցությունն է այն հաղթանակը, որով մենք տարածաշրջանում մեր դերը ֆիքսելու ենք։ Մեր լավ ապրելն է, մեր սփյուռքի հայրենակիցների վերադարձն է Հայաստան մեր հաղթանակը»,-ասաց նա։
Նրա խոսքով, ինչքան էլ իշխանությունները փորձեն մոռացության մատնել հայրենիքը, արցախյան հաղթանակները, գաջողության հասնել չեն կարող։
«Մեր ամենամեծ սխալը երևի այն էր, որ իրենց վստահեցինք մեր երկրի անվտանգությունը, մեր սխալը պետք է օր առաջ ուղղել․ Չի կարելի ներել այդքան սխալներ, որոնք արժեք ունեն։ Իսկ արժեքը նաև մեր զոհերն են»,-ասաց Ն. Կարապետյանը։
