«Մեր խնդիրն է, որ նաև մեր բանակը հնարավորինս ամենաբարձր մակարդակի պաշտպանունակություն ունենա, որպեսզի նաև մեր պետությունը հնարավոր ագրեսիայի համար գայթակղիչ չլինի»,-ասաց Ջրեմուկում պատերազմի մասնակից զինվորոկանի տուն մտած Նիկոլ Փաշինյանը։
Զինվորականը հրավիրեց Ջերմուկում քարոզարշավ իրականացնող ՔՊ-ի առաջնորդին՝ ասելով, թե ուզում է ցույց տալ Փաշինյանի կողմից իրեն նվիրած բնակարանը։
Արդեն տանը զինվորականը հեռախոսով ցույց տվեց լուսանկար, որում երևում էր նախորդ օրվա դրությամբ դեպի Մեղրիի դիրքեր ձնից մաքրված ճանապարհը, երբ ձյան հաստությունը 2 մետր էր։
Նիկոլ Փաշինյանն էլ ասաց, թե նախորդ օրը զորացրված զինծառայողը հայտարարել էր, թե դեպի դիրքեր տանող ճանապարհները փակ են, բայց լուսանկարից երևում է, որ տեխնիկայով բացված են։
Այնուհետև Նիկոլ Փաշինյանը նվեր տվեց զինվորականին, որից նա փորձեց հրաժարվել։
«Տուն ենք մտել, հո՞ դատարկ ձեռքով չէինք մտնելու, եղբայր»,- ասաց Փաշինյանը։
Զինվորականն ասաց, որ ինքը ծառայում է, բայց խնդրեց, որ խաղաղություն բերեն։
Փաշինյանն էլ ասաց, թե խաղաղությունը բերած է, ուղղակի պետք է տեր կանգնել։
