ՌԴ ԱԳՆ ԱՊՀ երկրների չորրորդ դեպարտամենտի տնօրեն Միխայիլ Կալուգինը ՏԱՍՍ-ին տված հարցազրույցում անդրադարձել է տարածաշրջանային տրանսպորտային ուղիների ապաշրջափակմանը՝ մասնավորապես մեկնաբանելով «Թրամփի ճանապարհ» նախագիծը։
Ըստ պաշտոնյայի՝ այս նախաձեռնությունը նորություն չէ և հիմնված է Ռուսաստան-Ադրբեջան-Հայաստան եռակողմ աշխատանքային խմբի երկամյա աշխատանքի վրա։ Կալուգինը նշել է, որ դեռ 2023-ին կողմերը մոտ էին «Մեղրիի երթուղու» գործարկմանը, որը պետք է լիարժեքորեն կապեր հայկական և ադրբեջանական երկաթուղային ցանցերը, մինչդեռ ամերիկյան ներկայիս նախագիծը նման ավտոմատ միացում չի նախատեսում։
Ինչպես հաղորդում է ՏԱՍՍ-ը, ռուսական կողմը մատնանշում է մի շարք խոչընդոտներ, որոնք կարող են բարդացնել «Թրամփի ճանապարհի» իրականացումը։ Դրանց թվում են՝
իր սահմանների մոտ ԱՄՆ ներկայության նկատմամբ Իրանի բացասական վերաբերմունքը և ասիական գործընկերների հնարավոր անվստահությունը,
առանց ռուսական և չինական բեռների՝ նախագծի ներդրումների փոխհատուցման ծայրահեղ դժվարությունը,
հայ-իրանական սահմանին ռուս սահմանապահների առկայությունը, Հայաստանի անդամակցությունը ԵԱՏՄ-ին և «Հարավկովկասյան երկաթուղու» կոնցեսիոն պայմանագիրը, որը գործում է մինչև 2038 թվականը։
«Խնդիրն այն է, որ հայ-ամերիկյան նախաձեռնությունը, ի տարբերություն «Մեղրիի երթուղու», ավտոմատ կերպով չի նախատեսում Հայաստանի և Ադրբեջանի երկաթուղային ենթակառուցվածքների լիարժեք կապ։ Մեր մեղքը չէ, որ Երևանը միտումնավոր սառեցրեց եռակողմ աշխատանքային խմբի աշխատանքը 2023 թվականին»,- ասել է նա։
Մի շարք փորձագետներ կարծում են, որ հաշվի առնելով Իրան-ԱՄՆ հակամարտությունը՝ «Թրամփի ճանապարհի» գործարկման հեռանկարները մռայլ են։
