Թուրքիայի արտաքին գործերի նախարարության մամուլի քարտուղար Օնջյու Քեչելին հայտարարել է, որ 2022 թվականից մեկնարկած Հայաստան-Թուրքիա հարաբերությունների կարգավորման գործընթացի շրջանակներում, 2026 թվականի մայիսի 11-ի դրությամբ ամբողջությամբ ավարտվել են երկու երկրների միջև ուղղակի առևտրի մեկնարկին ուղղված բյուրոկրատական նախապատրաստական աշխատանքները։
Ինչպես հայտնում է Թուրքիայի ԱԳՆ պաշտոնական ներկայացուցիչը, ներդրված նոր կարգավորումների շնորհիվ այսուհետ հնարավոր է դառնում երրորդ երկրների տարածքով իրականացվող առևտրի ժամանակ որպես ապրանքների վերջնական ուղղություն նշել հենց «Հայաստան/Թուրքիա» հասցեները։
Չնայած առևտրային փաստաթղթաշրջանառությանն առնչվող այս առաջընթացին, երկու երկրների միջև ցամաքային սահմանի բացման ուղղությամբ տեխնիկական և բյուրոկրատական աշխատանքները դեռևս շարունակվում են։
Ըստ Օնջյու Քեչելիի՝ Թուրքիան հավատարիմ է մնում Հարավային Կովկասում տնտեսական կապերի զարգացմանը և մտադիր է շարունակել քայլերը տարածաշրջանում տևական խաղաղության ու բարեկեցության հաստատման ուղղությամբ՝ ի շահ բոլոր երկրների և ժողովուրդների։
