Ապարանում ընթացող նախընտրական քարոզարշավի շրջանակում լրագրողների հետ ճեպազրույցի ժամանակ Էկոնոմիկայի նախարար Գևորգ Պապոյանը հայտնել է, որ առաջիկա օրերին Հայաստան կմատակարարվի նաև իրանական հեղուկ գազ.
«Իրանից հեղուկ գազի ներմուծման հետ կապված խնդիրը լուծվել է, և առաջիկա օրերին Հայաստան կմատակարարվի նաև իրանական հեղուկ գազ, ինչը կարող է նպաստել գների նվազմանը։ Մայիսի սկզբին Հայաստան շատ քիչ քանակով հեղուկ գազ էր մտնում, ինչի հետևանքով հիմնականում հեղուկ գազ չկար։ Մեր պլան մինիմումն էր Հայաստանում ապահովել հեղուկ գազի ծավալը, և այսօր դա արդեն ապահովված է: Հայաստանում կա արդեն հեղուկ գազ բոլոր տեղերում»,- ասել է նախարարը։
Հեղուկ գազը վերջին օրերին 300 դրամը գերազանցում էր, սակայն այսօր արդեն, ըստ Պապոյանի, այն կարելի է գնել 240 դրամով, բայց այդ գինը դեռ պետք է իջնի:
«Իրանում Էկոնոմիկայի նախարարության կցորդը երեկ ինձ զեկուցել է, որ Իրանից հեղուկ գազի արտահանման խնդիրը լուծվել է։ Դա նշանակում է, որ առաջիկա օրերին Հայաստան է մտնելու նաև իրանական հեղուկ գազ, ինչն էլի գները կիջեցնի ներքև»,- նշեց նախարարը։
