Իրանի արտաքին գործերի նախարար Աբաս Արաղչին X սոցիալական ցանցի իր էջում հանդես է եկել կոշտ հայտարարությամբ՝ ուղղված Արաբական Միացյալ Էմիրություններին։ Իրանցի բարձրաստիճան դիվանագետը պնդում է, որ Թեհրանը վաղուց տեղյակ է եղել Իսրայելի վարչապետ Բենիամին Նեթանյահուի՝ Աբու Դաբի կատարած ենթադրյալ այցի մասին, որն իրականացվել է Թեհրանի դեմ ուղղված ամերիկա-իսրայելական արշավի թեժ պահին։
«Նեթանյահուն այժմ հրապարակայնորեն բացահայտեց այն, ինչ Իրանի անվտանգության ծառայությունները վաղուց փոխանցել էին մեր ղեկավարությանը»,- գրել է Արաղչին՝ այդպես էլ չպարզաբանելով, թե ինչու Իրանը շաբաթներ առաջ չէր հանրայնացրել իր ձեռքի տակ եղած ենթադրյալ հետախուզական տվյալները։
Իրանի ԱԳ նախարարը Միացյալ Էմիրությունների գործողությունները որակել է որպես «աններելի դավադրություն» և զգուշացրել հետևանքների մասին։
«Թշնամանքը Իրանի մեծ ժողովրդի դեմ հիմար խաղադրույք է, իսկ այդ հարցում Իսրայելի հետ համագործակցությունը՝ աններելի։ Նրանք, ովքեր համագործակցում են Իսրայելի հետ՝ պառակտում սերմանելու նպատակով, պատասխանատվության կենթարկվեն»,- նշել է Արաղչին։
