ՀՀ վարչապետ Նիկոլ Փաշինյանը հայտարարել է, որ Հայաստանի խորհրդարանական ընտրությունները աշխարհաքաղաքական ենթատեքստ ու համատեքստ չունեն։
«Ե՛վ քաղաքական պրոցեսին մասնակից ուժեր, և՛ մեկնաբաններ, և՛ Հայաստանից դուրս գտնվող մեկնաբաններ ու քաղաքական գործիչներ փորձում են այս ընտրություններին տալ աշխարհաքաղաքական ենթատեքստ կամ համատեքստ։ Բայց այս ընտրությունները աշխարհաքաղաքական ենթատեքստ կամ համատեքստ չունեն և չեն էլ կարող ունենալ մի պարզ տրամաբանությամբ՝ Հայաստանը որդեգրել է բալանսավորված ու բալանսավորման քաղաքականություն։ Եվ մեր քաղաքականության մեջ ոչ մի դավադրություն, ոչ մի ընդդեմ գործողություն չկա»,- ասել է նա։
Փաշինյանը նաև նշել է․ «Ռուսաստան կատարած իմ այցերից մեկի ժամանակ մեր գործընկերներից մեկն ասաց՝ հենց հանդիպման ժամանակ ասաց, որ Հայաստանը Եվրամիության հետ համագործակցությամբ վնաս է հասցնում, օրինակ, Ռուսաստանի շահերին։ Ես լսեցի ու ասացի՝ շատ լավ։ Ես ասել եմ, որ մենք ՌԴ շահերին վնասելու ոչ մի մտադրություն չունենք, բայց հիմա դուք պնդում եք անում։ Խնդրում եմ՝ ներկայացրեք մի օրինակ, որտեղ ԵՄ-ի հետ մեր համագործակցությունը Ռուսաստանին հասցրել է առարկայական վտանգ։ Եվ հասկանալի է, չէ՞, որ առավել քան լուրջ մարդկանց հետ գործ ունենք։ Գիտե՞ք՝ ինչ էր պատասխանը․ լռություն»։
Նա խոսել է նաև ՌԴ-ի հետ հարաբերությունների մասին՝ ասելով, որ ԵՄ-ում էլ են եղել կասկածներ, թե Հայաստանն օգնում է ՌԴ-ին շրջանցել պատժամիջոցները։ «Մենք ասել ենք, որ սանկցիոն ռեժիմի մեջ չենք մտնելու, բայց նաև ասել ենք, որ քայլեր չենք անելու, որ ինքներս ընկնենք սանկցիաների տակ։ Ասել ենք՝ չենք ուզում ՌԴ-ի դեմ որևէ բան անել, բայց ունենք գիծ՝ եթե որևէ քայլ անելուց զգանք, որ ինքներս ենք ընկնելու սանկցիայի տակ, չենք անելու և խնդրել ենք ըմբռնումով մոտենալ, որովհետև եթե ՌԴ-ն կարող է սանկցիայի տակ ընկնել ու դիմանալ, Հայաստանը չի կարող։ Եվ ԵՄ-ում էլ եղել են կասկածներ, որ մենք շրջանցում ենք»։
