Իրանը, որպես Իսրայելի և ԱՄՆ-ի հետ դիմակայությունում հաղթած կողմ, սահմանում է ապագա կարգավորման պայմանները։ Այսպիսի կարծիք է հայտնել Իրանի խորհրդարանի ներքին գործերի հանձնաժողովի նախագահ Մոհամմադ Սալեհ Ջոքարը՝ ընդգծելով, որ 10 կետից բաղկացած ծրագիրը «կարմիր գիծ» է Իսլամական Հանրապետության համար։
«Պայմանները սահմանում է այն երկիրը, որը հաղթել է մարտի դաշտում, ոչ թե այն երկրի կառավարությունը, որը ձախողվել է, չի հասել իր նպատակներին և միայն ավերածություններ է բերել։ Այդ պատճառով ամերիկացիները պետք է ընդունեն մեր պայմանները», – ասել է նա Mehr գործակալությանը տված հարցազրույցում։ Ջոքարը հավելել է, որ Իրանի 10 կետանոց պայմանները «կարմիր գիծ են ցանկացած բանակցության համար»։
Խորհրդարանի անդամը նշել է, որ Իրանը «երբեք չի վստահել ԱՄՆ-ին», և իր երկրի համար այլ ճանապարհ չկա, քան «ավելի ուժեղ դառնալը»։ Բացի այդ, նա կոչ է արել ամերիկյան զորքերին լքել տարածաշրջանը։
Ապրիլին Իսլամական Հանրապետության պետական հեռուստատեսությունը հաղորդել էր, որ Թեհրանը ներկայացրել է հրադադարի 10 պայման։ Դրանց թվում են՝ չհարձակման սկզբունքը, Իրանի վերահսկողությունը Հորմուզի նեղուցի նկատմամբ, ուրանի հարստացումը երկրի տարածքում, հիմնական և երկրորդային պատժամիջոցների չեղարկումը, փոխհատուցումների վճարումը, ինչպես նաև ամերիկյան ուժերի դուրսբերումը տարածաշրջանից։
