«Հայաստանի ժողովրդի հարստությունից ավելի քան 1 տրիլիոն դրամ գումար չպետք է դրվի Ակադեմիական քաղաք ծրագրի վրա, այն բացարձակապես անմիտ է»,- քարոզարշավի շրջանակում «Ակադեմիական քաղաք» այցի ժամանակ ասաց «Լուսավոր Հայաստան» կուսակցության վարչապետի թեկնածու Էդմոն Մարուքյանը։
Նա ընդգծեց, որ այս ծրագիրը պետք է չեղարկվի, այս ծրագրի պատասխանատուները պետք է վճարեն մինչ օրս ծախսած գումարները. «Պետք է արվի հետևյալը. եթե որևէ բան պետք է այստեղ կառուցվի, ուրեմն լավ տարբերակ կարող է լինել պետական բոլոր հիմնարկները, կառավարական տները տեղափոխել այս տարածք։ Քաղաքը կբեռնաթափվի, կենտրոնը կլինի երիտասարդական»։
Մարուքյանի խոսքով, երեք տարի է այս թեմայի վրա PR է արվում. «Երեք տարվա մեջ ինչ ունենք՝ գարշահոտություն, փոշի, կողքերը հանքեր են և «ակադեմիական քաղաք»։ Չեղած բան է։ Փաշինյանը հիմա էլ ասում է, կառավարությունը ռազմավարական որոշում է ընդունել, պետք է լինի մոդուլային ատոմակայան։
Ինչքան սա ակադեմիական քաղաք է, այնքան էլ այն կլինի մոդուլային ատոմակայան։ Սուտ թեզ է առաջ քաշվում, սուտ թեզի հիման վրա իրականը ոչնչացվում է, իրական համալսարանները փակվում են, ոչնչացվում են»,- ասաց նա։
