«Politico» պարբերականի հաղորդմամբ՝ Գերմանիայի նախկին կանցլեր Անգելա Մերկելը WDR հեռուստաալիքին տված հարցազրույցում քննադատել է Եվրամիությանը՝ Ուկրաինայում ընթացող պատերազմը դադարեցնելու համար իր դիվանագիտական պոտենցիալը բավարար չափով չօգտագործելու համար։
Մերկելն ընդգծել է, որ թեև Ուկրաինային ռազմական աջակցություն ցուցաբերելն ու զսպման մեխանիզմներ ստեղծելը միանգամայն ճիշտ քայլեր են, սակայն միայն ԱՄՆ նախագահ Դոնալդ Թրամփի՝ Ռուսաստանի հետ կապ պահպանելը բավարար չէ։
Այս հայտարարությունը հնչում է այն ֆոնին, երբ Եվրոպայում մեծանում է ճնշումը խաղաղության հատուկ բանագնաց նշանակելու հարցում, հատկապես երբ Թրամփի թիմն այժմ կենտրոնացած է Իրանի դեմ պատերազմի վրա։
Չնայած Մերկելի անունը շրջանառվում է որպես հնարավոր միջնորդի, նա հայտարարել է, որ պաշտոնական առաջարկ չի ստացել և իրեն հարմար թեկնածու չի համարում, քանի որ արդեն չունի քաղաքական իշխանություն, որն անհրաժեշտ է Վլադիմիր Պուտինի հետ արդյունավետ բանակցելու համար։
Միևնույն ժամանակ, Գերմանիայի գործող կանցլեր Ֆրիդրիխ Մերցը հայտարարել է, որ ԵՄ-ի անունից հանդես եկող մեկ միասնական բանագնացի նշանակումն այս պահին նախատեսված չէ, քանի որ Մոսկվան դեռ պատրաստակամություն չի հայտնել նստելու բանակցությունների սեղանի շուրջ։
