«Ուժեղ Հայաստան» կուսակցության թեկնածուի կազմակերպմամբ Լոռու մարզի մի շարք ընտրողների բնակարանների վարձավճարները վճարելու գործով ձերբակալված 4 անձի նկատմամբ որպես խափանման միջոց կիրառվել է կալանքը. տեղեկությունը Radar Armenia-ին հայտնեցին Հակակոռուպցիոն կոմիտեից։
«Ընտրակաշառք տալու, ստանալու, բարեգործության արգելքը խախտելու և անձի ընտրական իրավունքի ազատ իրականացմանը խոչընդոտելու դեպքերի առթիվ նախաձեռնված քրեական վարույթի շրջանակում ձերբակալված 4 անձի նկատմամբ որպես խափանման միջոց կիրառվել է կալանքը»,- ասացին կոմիտեից։
Հիշեցնենք, որ Հակակոռուպցիոն կոմիտեն հաղորդել էր, որ պարզվել է՝ «Ուժեղ Հայաստան» կուսակցության թեկնածուի կազմակերպմամբ մի շարք անձինք, օրենսդրական արգելքի պայմաններում, վճարել են ՀՀ Լոռու մարզի մի շարք ընտրողների բնակարանների վարձավճարները։ Նշվում է, որ դրամական միջոցների շարժի վերահսկումը դժվարացնելու նպատակով նրանք ծրագրել են ֆինանսական գործառնությունների համար օգտագործել ռուսական բանկային քարտեր։
