ԱԱԾ-ն խուզարկություններ է սկսել Անդրանիկ Թևանյանի «Մայր Հայաստան» կուսակցության գրասենյակում։
Կուսակցության ներկայացուցիչ Արեգնազ Մանուկյանն իր ֆեսբուքյան էջում հայտնել է. «Առավոտյան ուղիղ ժամը 7-ին ԱԱԾ դիմակավորված աշխատակիցները մտան «Մայր Հայաստան» կուսակցության գրասենյակ»։
Հիշեցնենք, որ քրեական վարույթ է հարուցվել լրտեսության ու պետական դավաճանության գործով։ Ըստ նախաքննական մարմնի. «2024 թվականի ընթացքում հավաքագրվելով օտարերկրյա հատուկ ծառայությունների կողմից, «Ռուսսիա Կովկաս» աշխարհաքաղաքական կենտրոնում տնօրեն հանդիսացող՝ օտարերկրյա հատուկ ծառայությունների ներկայացուցչի հանձնարարությամբ նույն ժամանակահատվածում կատարել է լրտեսություն, ինչպես նաև ապօրինի կերպով հավաքել և առանձնապես խոշոր չափերի՝ 622 000 ԱՄՆ դոլար գումարի դիմաց վերջինիս է փոխանցել պետական գաղտնիք պարունակող՝ 2024 թվականի ապրիլին ԱԺ փակ, գաղտնի նիստում կայացած լսումների ընթացքի և արդյունքների վերաբերյալ ռուսերեն թարգմանված տեղեկություններ»։
Ինքը՝ Թևանյանը հերքել էր իրեն ներկայացված մեղադրանքը՝ ասելով, որ 2024թ. արդեն պատգամավոր չի եղել, այլ՝ 2023թ. վայր է դրել մանդատը։
