«Խայտառակ վիճակ է, վախի ու ատելության քարոզի մթնոլորտ է»,- ասուլիսում ասաց «Միասնության թևեր» կուսակցության վարչապետի թեկնածու Արման Թաթոյանը՝ ամփոփելով ընտրարաշավի 2 շաբաթները։
Ըստ նրա, տպավորություն է, որ կա ընդամենը ռեսուրսների մրցավազք. «Ստացվում է մարդը պետք է ընտրություն անի՝ ում արտաքին ուժերի օգտին է ընտրելու՝ Մոսկվա, Բրյուսել, Բաքու, Վաշինգտոն։ Որևէ մեկը չի խոսում այն մասին, թե Հայաստանին ինչ է պետք, Հայաստանի ընտրությունը որը պետք է լինի։
Պետք է հասկանանք՝ այս իրավիճակից ելքը որն է, ոնց ենք դուրս գալու այս իրավիճակից»։
Ինչ վերաբերում է ձայնագրությանը, որում լսվում է, որ «ուսանողներին, դասախոսներին պարտադրում են գնալ իշխանության նախընտրական քարոզարշավին», Ա. Թաթոյանն ասաց, որ որևէ արձագանք չի ստացել իրենց կողմից ներկայացված հանցագործության մասին հաղորդումը։
«Հատուկ նշել էինք անուններ, սակայն որևէ մեկը նրանցից հարցաքննվե՞լ է, ձեբակալվե՞լ է, իսկ հակառակ կողմից ի՞նչ է տեղի ունենում. իշխանության հետ իրավապահները սինխրոն աշխատում են, իշխանությունը մի հատ հայտարարություն է անում ցույցի ժամանակ, միանգամից հայտարարություն է լինում իրավապահներից։ Այստեղ ընդհանրապես կապ չկա մարդու իրավունքների, ժողովորդավարության հետ, ամբողջը քաղաքական քարոզարշավի բաղադրիչներով է»,- ասաց Ա. Թաթոյանը։
Նա նաև նշեց, որ «այս իշխանությունը մահը դարձել է որպես պաշտամունք»։
«Խոսում են՝ զինվորների ու առհասարակ մարդկանց զոհվելու մասին՝ ինչու չեք զոհվել պատերազմի ժամանակ։ Ինչպես կարող է մարդ, ով վարչապետ է, ում ասելով մեր զինվորները գնացել են պատերազմ, զոհվել են հերոսաբար, բայց այն տղերքը, որոնք վերադարձել են, ասում է՝ ինչու չեք զոհվել։ Ես սա գնահատում եմ բացառապես որպես մեղքը մեր զինվորների վրա դնելու ակնհայտ քայլ, իրենց վրայից մեղքը գցում ու դնում են զինվորների վրա, նաև պատասխանատվությունից փախնելու համար։
Իսկ պաշտպանության նախարարն էլ լակոտի պես է իրեն պահում, խոսում է «արա»-ով, ասում է՝ հիմնավորեք, ինչու չեք զոհվել։ Դու կարո՞ղ ես հիմնավել, թե ինչու դու չես զոհվել, դու կարող ես հիմնավորելու, թե ինչու կացարանում մեր 15 զինվորները մահացան։
Բա դու պաշտպանության նախարար ես։ Քո ֆունկցիան այն է, որ պատերազմն այսպես կազմակերպես, քաղաքականության տանես, որ հնարավորինս քիչ մարդ զոհվի, ոչ թե ասես՝ ինչո՞ւ չեք զոհվել»,- ասաց Թաթոյանը։
