Ռուսաստանի Անվտանգության խորհրդի փոխնախագահ Դմիտրի Մեդվեդևը հայտարարել է, որ Հայաստանի վարչապետ Նիկոլ Փաշինյանն ուղղակի վտանգի տակ է դրել հարաբերությունները Ռուսաստանի, ՀԱՊԿ-ի և ԵԱՏՄ-ի հետ, և նրա գործողությունները լուրջ հետևանքներ կունենան: Այս մասին նա հայտնել է «ՌԻԱ Նովոստի» գործակալությանը տված հարցազրույցում։
Մեդվեդևի խոսքով՝ Հայաստանը հանդիսանում է ԵԱՏՄ անդամակցությունից իբր ամենամեծ օգուտներ ստացող երկրներից մեկը, սակայն գործող վարչապետը չի գնահատել Մոսկվայի «եղբայրական օգնությունն ու ընտրել է հարաբերությունների խզման ուղին»։
«Նա, ըստ էության, խզել է կապերը ՀԱՊԿ-ի հետ, թեև հենց ՀԱՊԿ շրջանակներում Ռուսաստանը միշտ պատրաստ է եղել պաշտպանել Հայաստանը՝ իր իսկ կողմից ճանաչված սահմաններում։ Հրաժարվել է մասնակցել ԵԱՏՄ գագաթնաժողովներին և Երևանում հավաքում է Ռուսաստանի նենգ թշնամիներին»,- նշել է Մեդվեդևը՝ ընդգծելով, որ այս ամենն անհետևանք չի մնա, այդ թվում՝ տնտեսական համագործակցության ոլորտում։
Երևանն ավելի վաղ սառեցրել էր իր անդամակցությունը ՀԱՊԿ-ին, իսկ Նիկոլ Փաշինյանն իր հայտարարություններում ավելի հավանական էր համարել կառույցից երկրի վերջնական դուրս գալը, քան մասնակցության վերականգնումը։
