Իրանի ԱԳՆ խոսնակ Էսմայիլ Բաղային հայտարարել է, որ Թեհրանն ու Վաշինգտոնը քննարկվող թեմաների մեծ մասի շուրջ հանգել են ընդհանուր եզրակացության, սակայն դա չի նշանակում, թե համաձայնագրի ստորագրումը մոտ ժամանակներս է սպասվում:
ԱԳՆ խոսնակի փոխանցմամբ՝ բանակցությունների այս փուլի հիմնական կենտրոնացումը պատերազմի դադարեցումն է, և միջուկային խնդրի մանրամասներն այս պահին չեն քննարկվում։
«Այն, որ մենք քննարկվող թեմաների մեծ մասի վերաբերյալ եկել ենք եզրակացության, ճիշտ է։ Այնուամենայնիվ, չի կարելի պնդել, որ համաձայնագրի ստորագրումն անխուսափելի է»,- ասել է նա։
Անդրադառնալով ամերիկյան կողմի հայտարարություններին՝ Բաղային նշել է, որ սպառնալիքները, ճնշումներն ու քաղաքական պատկերացումների հանրայնացումը արևմտյան քաղաքականության մասն են, մինչդեռ Իրանն առաջնորդվում է բացառապես գետնի վրա առկա իրողություններով։
