Հայաստանի ԳԽ և ԼՂՀ ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է․
«Վերջին օրերին որոշակի շրջանակներ և առանձին անձինք կասկածի տակ են դնում «Խրոնիկա Կավկազա» ու «Ինսայդեր» կայքերի տարածած տեղեկությունները և խորհուրդ տալիս չհավատալ դրանց։ Խոսքը Ռուսաստանի կողմից Հայաստանի ընդդիմությանը ցուցաբերվող ֆինանսական, քաղտեխնոլոգիական և քարոզչական, մեղմ ասած, աջակցությունը «հաստատող նյութերի» մասին է։
Բայց եթե անգամ հիշյալ կայքերն «էժանագին» են, միևնույն է, դրանց տարածած նյութերը խիստ արժանահավատ են թվում։ Բանն այն է, որ ապրիլի 1-ի Պուտին-Փաշինյան հանդիպումից հետո Ռուսաստանի բարձրաստիճան պաշտոնյաները՝ ներառյալ ՌԴ Անվտանգության խորհրդի փոխնախագահ Դմիտրի Մեդվեդևը, ԱԳ նախարար Սերգեյ Լավրովը և ԱԽ քարտուղար Սերգեյ Շոյգուն, գրեթե ամենշաբաթյա ռեժիմով հակափաշինյանական խոսույթ են տարածում, իսկ պետական-պաշտոնական մամուլը նույն գծի մեջ է ամենժամյա ռեժիմով։ Ո՞ւմ են աջակցում այդ «ահարկու տիրադաները», եթե ոչ՝ Հայաստանի ընդդիմադիր ուժերին»։
