«Մենք պետք է ճիշտ հասկանանք այս ռազմական շքերթի իրական նպատակներն ու համատեքստը»,-«Միասնության Թևեր» կուսակցության վարչապետի թեկնածու Արման Թաթոյանը տեսաուղերձով անդրադարձել է այսօր՝ մայիսի 28-ին, Առաջին Հանրապետության տոնի առթիվ անցկացվող ռազմական շքերթին։
Նրա խոսքով, այդ համատեքստն այն է, որ գործող վարչապետը և նրա շրջապատը, որոնք ամեն օր նվաստացնում են մեր զինվորներին, նրանց ընտանիքներին, մեր վետերաններին, կռված մարդկանց, իրենց վեց տարվա ձախողումները փորձում են թաքցնել մեր հերոս զինվորների թիկունքում։
«Այդ վեց տարիները մեզ բերել են երեք խոշոր պատերազմ, երեք պարտություն և երրորդ հայկական ցեղասպանությունը»,- ասել է Թաթոյանը։
Նրա խոսքով՝ զինվորականներն արժանի են ունենալու այնպիսի ղեկավարություն, որը կհարգի նրանց և նրանց ընտանիքների զոհողությունները։
«Մեր զինվորականները արժանի են ունենալ լավ ղեկավարություն՝ այնպիսի ղեկավարություն, որը նրանց չի նվաստացնում հանուն նրա, որ հաճոյանա մեր թշնամիներին։ Սիրելի զինվորականներ, հունիսի 7-ը մեր երկիրը ազատագրելու օրն է, մենք պետք է հետ վերցնենք մեր երկիրը, որպեսզի այնպես չլինի, որ դուք ունենաք ղեկավարություն, որոնք չեն հարգում ձեր սխրանքը, ձեր ընտանիքի զոհողությունները»,- նշել է նա։
