«Օրեր առաջ ադրբեջանական աղբյուրներով մեր դեմ քարոզչություն սկսվեց և այդ քարոզչությունը սկսեց իրականացնել Դանիել Իոանիսյանը, ով ԿԸՀ-ի կողմից հավատարմագրված դիտորդ է, իսկ դիտորդը պետք է լինի անաչառ, անկախ և չպետք է որևէ ուժի օգտին կամ դեմ քարոզչություն իրականացնի»։ Այս մասին իր տեսաուղերձում հայտարարել է «Լուսավոր Հայաստան» կուսակցության վարչապետի թեկնածու Էդմոն Մարուքյանը։
Նա հայտարարեց, որ իր քաղաքական ուժի դեմ իրականացվում է տեղեկատվական արշավ, որի մեջ, ըստ նրա, ներգրավված են նաև որոշ մեդիա և հասարակական գործիչներ։ Հարցը, Մարուքյանի խոսքով, ներկայացվել է Կենտրոնական ընտրական հանձնաժողով և գտնվում է քննության փուլում։
«Իմ համոզմունքը ավելի կայունացավ. ինձ ուղարկեցին Արեգ Քոչինյանի եթերը, ով որ էլի վիրավորական արտահայտություններ է անում մեր հասցեին և ով պետք է պայքարի մեր դեմ, իսկ Արեգ Քոչինյանը Բաքվում էր օրեր առաջ։ Բաքուն անցել է լայնածավալ հարձակման մեդիա դաշտում, փափուկ ուժով ընդդեմ «Լուսավոր Հայաստան» կուսակցության, իրենց անհանգստությունն այն է, որ ինչ էլ որ լինի միայն «Լուսավոր Հայաստան» կուսակցությունը չհայտնվի Ազգային Ժողովում, ուրիշ ոչ մի ուժի վերաբերյալ Բաքվից նոր եկած Արեգ Քոչինյանը ուղիղ եթեր չի արել»,- ասել է Մարուքյանը։
Մարուքյանի խոսքով՝ մեծ ազդեցություն է ունեցել Պետրոս Ղազարյանին տված հարցազրույցի հեռարձակումը։
«Բոլոր քաղաքական ուժերը ստացել են երկու եթեր՝ քարոզարշավից առաջ և հետո, մենք մի եթեր և այլևս չի լինելու, որից հետո արշավ է սկսվում իմ դեմ Բաքվից եկած մարդու շուրթերով»,- ասել է նա։
