«Մենք պետք է զարգացնենք և ծաղկեցնենք մեր երկիրը, իսկ դրա համար ամենակարևորը երաշխավորված խաղաղությունն է, որպեսզի պատերազմ այլևս չլինի։ Պատերազմի դռները պետք է ընդմիշտ փակվեն»,- այս մասին քարոզարշավի ընթացքում Ալավերդիում հայտարարեց «Բարգավաճ Հայաստան» կուսակցության նախագահ Գագիկ Ծառուկյանը։
Ըստ նրա, դա հնարավոր կլինի միայն այն դեպքում, երբ խաղաղությունը լինի երաշխավորված, և մեր հիմնական դաշնակիցները կանգնեն մեր կողքին ու իրենց ստորագրությամբ ապահովեն այդ համաձայնությունը։
Անդրադառնալով Ադրբեջանի պահանջներին՝ Ծառուկյանը ասաց, որ այսօր Ադրբեջանը շարունակում է մնալ մեր բարձունքների և գրավված տարածքների վրա ու նոր պահանջներ է ներկայացնում։
«Մեր գերիները դեռ այնտեղ են։ Եթե իսկապես խաղաղություն կա, ապա ինչո՞ւ գերիները չեն վերադարձվում, ինչո՞ւ չեն դադարում պահանջները։ Ադրբեջանը փորձում է ճնշում գործադրել, և մենք պետք է խելացի ու միասնական լինենք, որպեսզի առանց արյունահեղության, բանակցությունների և ճիշտ մոտեցումների միջոցով լուծենք առկա խնդիրները։ Չկա այնպիսի խնդիր, որը հնարավոր չէ լուծել ճիշտ բանակցությամբ և համագործակցությամբ՝ ի շահ ժողովրդի և պետության»,- ասաց ԲՀԿ առաջնորդը։
Ծառուկյանը նշեց, որ իր գործունեության ընթացքում միշտ խոսել է միայն այնպիսի ծրագրերի և քայլերի մասին, որոնք իր ուժերի սահմաններում են եղել իրականացնելու։ Նրա խոսքով, ձևավորվել է ուժեղ թիմ, որտեղ առաջնահերթ նշանակություն չունի մարդու կուսակցական պատկանելությունը կամ անկուսակցական լինելը։ Ըստ նրա, ամենակարևորը մասնագիտական կարողություններն ու տվյալ ոլորտում արձանագրած արդյունքներն են, քանի որ երկրի զարգացման համար անհրաժեշտ է ներգրավել այն մարդկանց, ովքեր իրենց աշխատանքով արդեն ապացուցել են իրենց արդյունավետությունը։
«Մենք մեկ ազգ և մեկ ժողովուրդ ենք։ Հայաստանում բազմաթիվ կուսակցություններ կան, բայց այսօր անհրաժեշտ է համախմբվել։ Պետք է միավորել բոլոր այն մարդկանց, ովքեր կարող են ապահովել անվտանգությունը, զարգացնել տնտեսությունը, լուծել ժողովրդի խնդիրները և մարդկանց դեմքին ժպիտ վերադարձնել։ Որոշումը ձերն է»,- դիմելով ժողովրդին՝ ասաց Գ. Ծառուկյանը։
Անդրադառնալով իշխանությունների քարոզարշավի ընթացքում ցուցաբերած պահվածքին՝ Գագիկ Ծառուկյանն ասաց, որ այսօր իշխանությունները տեսնում են հասարակական տրամադրությունները և անհանգստացած են։
«Եթե վստահ լինեին իրենց բարձր արդյունքների վրա, այսքան խառնված չէին լինի։ Բացառված է, որ մենք գումար բաժանենք, ձայն ուզենք։ Նման խոսակցությունները պարզապես վախի մթնոլորտ ստեղծելու փորձ են, բայց դա նրանց չի փրկելու։ Այսօր մարդկանց ազատում են աշխատանքից, ակտեր են գրում և ճնշումներ են գործադրում։ Բայց նրանք, ովքեր այսօր նման որոշումներ են կայացնում, պետք է մտածեն, թե ընտրություններից հետո ինչպես են պատասխան տալու իրենց գործողությունների համար»,- ասաց Գագիկ Ծառուկյանը։
