Հայ ժողովուրդը պետք է շատ զգույշ լինի Ռուսաստանի և Եվրոպայի միջև ընտրություն կատարելիս, որպեսզի չկրկնի այն, ինչ տեղի ունեցավ Ուկրաինայում։ Այս մասին «Վեստի» լրատվական ծրագրի համար Պավել Զարուբինին տված հարցազրույցում հայտարարել է Բելառուսի նախագահ Ալեքսանդր Լուկաշենկոն։
«Այդ իսկ պատճառով, նախքան նման քայլի դիմելը (խմբ.` ընտրություն ԵԱՏՄ-ի և ԵՄ-ի միջև), հայ ժողովուրդը պետք է շատ լուրջ մտածի։ Սա միակ բանն է, ինչին ես նրանց կոչ եմ անում։ Ժողովուրդը կարտահայտի իր կարծիքը, և մենք դրա հետ կհամաձայնենք»։
Լուկաշենկոն նշել է, որ եվրոպացի առաջնորդները, ովքեր նախկինում եկել էին երկիր, Հայաստանին ոչինչ չեն խոստացել. միայն քննադատել են Ռուսաստանին և Բելառուսին։
«Լսե՛ք, ինչ-որ մեկին սա ձեռնտու է։ Եկան, այնտեղ հավաքեցին ինչ-որ մարդկանց, դուք գիտեք, թե եվրոպացիներից ովքեր կային այնտեղ, խոստումների մի ամբողջ կույտ շռայլեցին, թեև մենք չլսեցինք այդ խոստումները, հնչում էին միայն Բելառուսին և Ռուսաստանին ուղղված դատապարտումներ, թե իբր մենք այսպիսին կամ այնպիսին ենք»։
