Հայաստանում գազի հետ կապված կարող է բարդ իրավիճակ ստեղծվել Ռուսաստանից մատակարարումների դադարեցման դեպքում, սակայն ՌԴ-ն չի ցանկանում իրավիճակի սրում, հայտարարել է ՌԴ փոխվարչապետ Ալեքսեյ Օվերչուկը «Վեստի» լրատվական ծրագրի համար Պավել Զարուբինին տված հարցազրույցում։
Նրա խոսքով՝ Երևանում ռուսականից բացի այլ գազ չի լինի։ Հարցը միայն այն է, թե որտեղից Հանրապետությունը կստանա այդ գազը։
«Նրանց ընդամենը պետք է նայել քարտեզին, տեսնել, թե ինչ խողովակաշարեր են այնտեղ գործում նույնիսկ հիմա։ Անմիջապես կտեսնեն, թե ումից են նրանք ստանալու ռուսական գազը՝ հաշվի առնելով 30% արտահանման տուրքը, հաշվի առնելով այն, որ դա լինելու է շուկայական գին, և հաշվի առնելով, որ միջնորդները նույնպես կցանկանան ստանալ եկամտի իրենց բաժինը։ Ուստի Հայաստանում իրավիճակը շատ բարդ է լինելու։ Մենք դա չենք ցանկանում»,- նշել է Օվերչուկը։
