Իրանը պատրաստ է Իսրայելի և Մերձավոր Արևելքի այլ երկրների ուղղությամբ մեծ թվով հեռահար հրթիռներ արձակել, քանի որ արագորեն վերականգնում է իր ստորգետնյա զինանոցները, հայտնում է CNN լրատվականը։
Ըստ պարբերականի ուսումնասիրած արբանյակային լուսանկարների՝ Թեհրանին հաջողվել է պարզունակ տեխնիկայի, օրինակ՝ բուլդոզերների ու ինքնաթափերի միջոցով բացել ԱՄՆ-ի և Իսրայելի կողմից ռմբակոծված ստորգետնյա թունելների 69 մուտքերից 50-ը, ինչպես նաև վերանորոգել ու ասֆալտապատել քանդված ճանապարհները։
Ռազմական փորձագետները նշում են, որ հակառակորդի թանկարժեք հարվածները, որոնք շաբաթներ շարունակ սահմանափակում էին իրանական հրթիռների կիրառումը, չեն կարողացել ոչնչացնել ստորգետնյա ենթակառուցվածքները, քանի որ Իրանն արդեն 20 տարի պատրաստվում էր նմանատիպ պատերազմի և խորը գետնի տակ պահպանել է շուրջ 1000 հրթիռ։
Չնայած Վաշինգտոնն ու Թեհրանը հրադադարից հետո նախնական համաձայնության են եկել Հորմուզի նեղուցի վերաբացման հարցում, փորձագետները նախազգուշացնում են, որ ռազմական գործողությունների վերսկսման դեպքում Իրանն ի վիճակի է անմիջապես շարունակել հարվածները, քանի որ հրթիռների արձակման կայանքներն ու անձնակազմը լիովին պատրաստ են։
CNN-ի փոխանցմամբ՝ ամերիկյան հետախուզական գնահատականները նույնպես փաստում են, որ Իրանը սպասվածից շատ ավելի արագ է վերականգնում իր ռազմական կարողությունները, այդ թվում՝ ԱԹՍ-ների արտադրությունն ու հրթիռային բազաները, ինչը վկայում է միայն ռազմական հարվածներով Թեհրանի հրթիռային պոտենցիալը լիովին չեզոքացնելու անհնարինության մասին։
