«Տնտեսությունը երկիր պահողն է, ժողովրդին կերակրողն է։ Մի բան պետք է հասկանան, տնտեսությունը չի լինում իշխանական կամ ընդդիմադիր։ Տնտեսությունը չի լինում ռուսամետ կամ արևմտամետ»,-երեկ Վանաձորում քայլերթի ընթացքում պատասխանելով ԵԱՏՄ-ից Հայաստանի հնարավոր դուրս գալու վերաբերյալ լրագրողների հարցերին՝ հայտարարել է ԲՀԿ առաջնորդ Գագիկ Ծառուկյանը։
Նրա խոսքով, այսօր տնտեսությունը քանդման եզրին է՝ իր բազմաթիվ բացասական հետևանքներով։
«Էս ժողովրդին ո՞վ է պահելու, ո՞վ է կերակրելու, այսպես չի լինում։ Խոսում են դատարկ-դատարկ, այլընտրանք ունենք, ասում են։ 10 տարի այդ այլընտրանքը չի լինելու։ Պետք է տիրապետեն՝ թե տնտեսությունն ինչ է։ Տնտեսությունը խաղալիք չէ։ Սուտ ասելուն պետք է վերջ տրվի»,-ասել է Գագիկ Ծառուկյանը՝ ընդգծելով, որ իշխանությունները գլուխ գովացին, թե խաղաղություն են բերել, բայց բերեցին տնտեսական պատերազմ։
Վանաձորում տեղի ունեցած հանդիպումն ամփոփելով՝ Գագիկ Ծառուկյանը ֆեյսբույան իր էջում նշել է.
«Լավ փոփոխությունների սպասող լոռեցիները համախմբվել են մարզկենտրոն Վանաձորում՝ մեկ նպատակի շուրջ․ հունիսի 7-ին իրենց քվեով նոր էջ բացել Հայաստանի պատմության մեջ և ազդարարել մեր երկրի սպասված վերածնունդը։
Վանաձորում տիրող ոգևորիչ մթնոլորտն ու համախմբվածությունը սկիզբն են այն մեծ ծրագրերի, որոնք միասնական ջանքերով իրականացնելու ենք հանուն մեր բոլորի՝ արժանապատիվ, անվտանգ և բարեկեցիկ ապագայի։
Բազմաթիվ անգամներ շեշտել եմ՝ ձեր վստահությունն ինձ համար ամենամեծ պատասխանատվությունն է, և ես այն պահելու ու պահպանելու եմ։
Սիրելի՛ հայրենակիցներ, միասին՝ դեպի լավ փոփոխություններ»։
