Սամվել Կարապետյանի աջակցությունը զինված ուժերին 44-օրյա պատերազմի ժամանակ էական ու բազմազան է եղել։ Այսօր լրագրողների հետ զրույցում հայտարարել է պաշտպանության նախկին նախարար Դավիթ Տոնոյանը։
Նա ընդգծել է, որ այդ աջակցությունը Կարապետյանի կողմից բանակին եղել է մինչև 2018 թվականը, դրանից հետո, ռազմական գործողությունների ընթացքում, նա հույս է հայտնել, որ բարերարը բանակին աջակցում է նաև հիմա։
«Բազմակողմանի ու էական է եղել այդ աջակցությունը, այն կարելի է գնահատել բավականին օգտակար»,-ասել է Տոնոյանը։
Լրագրողները հետաքրքրվել են, թե ի՞նչ օգնության մասին է խոսքը։ Ի պատասխան Տոնոյանը նշել է, այդ ամենն առկա է պաշտպանության նախարարությունում, ինքը զգայուն թեմաների վերաբերյալ տեղեկատվություն չի տրամադրի։
«Ես միշտ զսպվածություն եմ ցուցաբերում զգայուն հարցերի վերաբերյալ, որոնք վերաբերում են պաշտպանական համակարգին, ռազմական գործողություններին։ Տեղեկատվությունը զինված ուժերին աջակցելու մասին սենսիթիվ է, այն պարունակում, կամ պետական, կամ ծառայողական գաղտնիք, դրա համար ես չեմ խախտի իմ այդ սկզբունքը։
Միաժամանակ, կարծում եմ, որ գնահատանքի է արժանի զինված ուժերին ցանկացած աջակցություն ու բարեգործություն, մասնավորապես 44-օրյա պատերազմի ժամանակ անհատների ու կազմակերպությունների կողմից»,-ասել է պաշտպանության նախկին նախարարը։
