Այսօր Նիկոլ Փաշինյանն ուղիղ եթեր էր արել և երկար բարակ խոսել. իմաստն այն էր, որ ոչ մի հանրաքվե էլ չի անելու Եվրոմիություն գնալու համար, որովհետև դրա անհրաժեշտությունը չկա, որովհետև Հայաստանը չի դիմել ԵՄ-ի անդամակցության համար, որովհետև Հայաստանը չունի ԵՄ անդամության թեկնածուի կարգավիճակ։ Այս մասին ֆեյսբուքի իր էջում հրապարակված տեսաուղերձում ասել է «Լուսավոր Հայաստան» կուսակցության նախագահ Էդմոն Մարուքյանը։
Ինչի՞ մասին է այս խոսակցությունը։ Ես ուզում եմ դիմել Եվրոպամետ ընտրողներին։ Ես ուզում եմ ձեզ տեղեկացնել, որ դուք բացարձակապես խաբված եք, ձեզ խաբել են այս քարոզչությամբ, որ դուք գնաք ձեր ձայները տաք Նիկոլ Փաշինյանին, իշխանությանը, որ իբր ինքը տանում է Եվրոպա, ինքը պրոամերիկյան է։ Ոչ մի բան չի լինելու, մենք սա տեսել ենք, չորս ու կես տարի Սերժ Սարգսյանը բանակցել է ասոցացման համաձայնագիր չորս ու կես տարի, եկել է պահը, որ պետք է քայլը կատարեր, գնացել դարձել է ԵԱՏՄ անդամ մեկ օրում։ Հիմա նույն բանն է, Նիկոլ Փաշինյանը վերջին տարիներին այս քարոզչությունն արել է մի բանի համար, որ Եվրոպամետ ձևավորված ընտրողների ձայները կոնսոլիդացնի իր կողմ, պրոեվրոպական ուժերը մնան դուրս, ինքը դրանց ձայներն էլ տանի։ Բոլոր Եվրոպամետ ընտրողները, ովքեր պատրաստվում են իրենց ձայնը տալ Նիկոլ Փաշինյանին կամ իրենց կողքի ուժերին, իմացեք, դուք ձեր ձայնը վառում եք։ Ինչո՞ւ, որովհետև ձեր ձայները չեն գնում պրոեվրոպական օրակարգին, Եվրոպամետ օրակարգին չեն ծառայում դրանք»,- մանրամասնեց Է. Մարուքյանը։
ԼՀԿ նախագահը շեշտեց, որ գործող իշխանությունները եվրոպական կյանքի որակի բարեփոխումներ անգամ չեն անելու։
«Այսինքն՝ ընտրություններից հետո ինքն ասում է՝ ես գնալու եմ Մոսկվա, այս հարցերը կարգավորեմ։ Ինչի մասին է դա։ Մոսկվայից ասեցին՝ հանրաքվե դիր, ինքը այստեղից ասում է՝ չենք դնելու հանրաքվե, մի մտածեք, սաղ լավ է, գալու եմ, ինչ ասեք՝ անելու եմ և ձեր ուզածով է լինելու։ Այնպես, ինչպես որ Սերժ Սարգսյանը չորսուկես տարի բանակցություններից հետո։ Սա այդ երկրորդ սերիան է։ Ըստ էության, կառավարման իմաստով Սերժ Սարգսյանը ու Նիկոլ Փաշինյանը շատ-շատ են իրար նման։ Հիմա ափսոսս գալիս է, որ Եվրոպամետ ընտրողները գնում իրենց ձայները տալիս են իշխանությանը։ Կորցնելու եք այս ձայները, եվրոպական օրակարգի, եվրոպական լոբինգի, եվրոպական կյանքի որակի, եվրոպական չափանիշներ, ստանդարտներ, վիզայի ազատականացում, ոչ մի բանի հետ ինքը կապ չունի»,- ընդգծեց Է. Մարուքյանը։
