Հեռուստաբանավեճի ընթացքում վարչապետ Նիկոլ Փաշինյանը կոշտ քննադատության է ենթարկել նախկին և ներկա ընդդիմադիր գործիչներին՝ անդրադառնալով ինչպես կոռուպցիոն մեղադրանքներին, այնպես էլ դատաիրավական համակարգին, բանակին և խաղաղության գործընթացին։
Խոսելով գործարար Գագիկ Ծառուկյանի մասին՝ Փաշինյանը հայտարարել է, որ նրա նկատմամբ ներկայացվել է հայց՝ շուրջ 300 միլիոն դոլարի ենթադրյալ ապօրինի ծագում ունեցող գույքի առնչությամբ։ Վարչապետը պնդել է, որ այդ միջոցները «ժողովրդից թալանված» են և կոչ է արել Ծառուկյանին պատասխանել առաջադրված մեղադրանքներին։
Անդրադառնալով երկրորդ նախագահ Ռոբերտ Քոչարյանին՝ Փաշինյանը հայտարարել է, որ վերջինս ազատության մեջ է մնում նաև «դատաիրավական մաֆիայի» գոյության պատճառով։ Նրա խոսքով՝ նոր Սահմանադրության ընդունումը կարող է դառնալ այդ համակարգը վերացնելու գործիքներից մեկը։
Վարչապետը քննադատել է նաև «Ուժեղ Հայաստանի» վարչապետի թեկնածու Սամվել Կարապետյանին՝ արձագանքելով նրա՝ բանակի վերաբերյալ հայտարարություններին։ Փաշինյանի խոսքով՝ Կարապետյանների ընտանիքի անդամները չեն ծառայել բանակում, մինչդեռ հազարավոր սոցիալապես անապահով ընտանիքներ իրենց զավակների ծառայությամբ ավելի մեծ ներդրում են ունեցել երկրի պաշտպանության գործում։
Խաղաղության գործընթացի թեմայով Փաշինյանը հայտարարել է, որ Ադրբեջանի կողմից առաջ քաշված «միջանցքի» պահանջը չի իրականացվել և չի իրականացվելու։ Նա նաև ընդգծել է, որ Հայաստանը շարունակում է զարգացնել իր զինված ուժերը՝ հերքելով պնդումները, թե Երևանը ստանձնել է բանակի սահմանափակման պարտավորություններ։
Վարչապետը պաշտոնապես բացառել է Հայաստանում 300 հազար ադրբեջանցիների վերաբնակեցման հնարավորությունը՝ այդ թեմայի տարածումը վերագրելով իր քաղաքական հակառակորդներին։
Փաշինյանի գնահատմամբ՝ այսպես կոչված «պատերազմի եռագլուխ կուսակցությունը» շահագրգռված չէ խաղաղության հաստատմամբ, քանի որ իր քաղաքական և տնտեսական դիրքերն ամրապնդել է հակամարտության պայմաններում։ Նրա խոսքով՝ այդ ուժերը փորձում են խոչընդոտել խաղաղության օրակարգի առաջմղմանը
