«Հայաստանն ընտրում է» հեռուստաբանավեճի ընթացքում վարչապետ Նիկոլ Փաշինյանը հայտարարել է, որ մինչև 2018 թվականը հայկական կապիտալի զգալի մասը «թալանի միջոցով հոսում էր պատերազմի եռագլուխ կուսակցության գրպանները»։ Նրա խոսքով՝ 2018 թվականից հետո շուրջ 6,6 մլրդ դոլար այդ շրջանակներից դուրս է բերվել և ուղղվել Հայաստանի պետական բյուջե։
Վարչապետը նաև նշել է, որ ապօրինի ծագում ունեցող գույքի բռնագանձման մեխանիզմի կիրառման արդյունքում պետությանը վերադարձվել է շուրջ 8 մլրդ դոլարի գույք և միջոցներ։ Փաշինյանի պնդմամբ՝ նախկինում պետական միջոցների յուրացում է իրականացվել, այդ թվում՝ մանկապարտեզների և զորանոցների ծախսերի արհեստական ուռճացման միջոցով։
Անդրադառնալով Հանրապետության հրապարակում տեղի ունեցած միջադեպին՝ վարչապետը հայտարարել է, որ տեղի է ունեցել «խայտառակ պատմական իրադարձություն»։
«Տեղի է ունեցել խայտառակ պատմական իրադարձություն․ Հանրապետության հրապարակում ադրբեջաներեն տեքստ է միացվել՝ ՀՀ իշխանություններին մեղադրելով 300 000 ադրբեջանցի բերելու մտադրության մեջ»,- ասել է վարչապետը։
Փաշինյանը խոսել է նաև Արցախի թեմայից՝ հիշեցնելով իր հայտնի հայտարարությունը. «Ես եմ այն մարդը, որ ասել է՝ «Արցախը Հայաստան է և վերջ»»։ Նրա խոսքով՝ այդ հայտարարությունը վկայում է իր հավատարմության մասին այն գործընթացներին, որոնց մասնակցել է 1988 թվականից ի վեր։ Միաժամանակ՝ վարչապետը նշել է, որ քաղաքական առաջնորդի պարտականությունն է տեսնել, երբ երկիրը հայտնվել է փակուղում կամ թակարդում, և ունենալ բավարար կամք՝ այն այդ իրավիճակից դուրս բերելու համար։
