Ռուսաստանի արտաքին գործերի նախարարության խոսնակ Մարիա Զախարովան հայտարարություն է տարածել Հայաստանում հունիսի 7-ին կայացած խորհրդարանական ընտրությունների վերաբերյալ՝ նշելով, որ դրանք անցել են ընդդիմության նկատմամբ աննախադեպ ճնշումների և Արևմուտքի, առաջին հերթին՝ ԵՄ-ի միջամտության պայմաններում:
Ըստ հայտարարության՝ Կենտրոնական ընտրական հանձնաժողովի հրապարակած նախնական արդյունքները վկայում են, որ հաղթանակի մասին հայտարարած «Քաղաքացիական պայմանագիր» կուսակցությունը չի ստացել իշխանության մենաշնորհ, և նրա աջակցությունը նախորդ ընտրական փուլի համեմատ իբր նկատելիորեն նվազել է:
Մոսկվան շեշտել է, որ հայ հասարակության մեջ առկա է հայ-ռուսական կապերի առաջընթաց զարգացման և եվրասիական ինտեգրացիոն կառույցներում Հայաստանի հետագա անդամակցության հստակ պահանջարկ, ինչը զգալի օգուտներ է բերում հայ ժողովրդին:
Ռուսական կողմի պնդմամբ՝ ողջ քարոզարշավն ու քվեարկության ընթացքն ուղեկցվել են իշխանությունների կողմից ընդդիմադիր ուժերի, նրանց ակտիվիստների և Հայ Առաքելական Եկեղեցու նկատմամբ իբր կոշտ բռնաճնշումներով, ինչը որակվել է որպես ժողովրդավարական սկզբունքների և ազատ ընտրությունների ընթացակարգերի կոպիտ խախտում:
Հայտարարության մեջ նշվում է, որ հալածանքներն ուղղվել են բացառապես այն ուժերի դեմ, որոնք կողմնակից են Ռուսաստանի հետ դաշնակցային հարաբերությունների ամրապնդմանը, ԵԱՏՄ-ին ու ՀԱՊԿ-ին անդամակցության շարունակականությանը և Եվրամիությանն անդամակցելու «փակուղային կուրսից» հրաժարվելուն:
«Մոսկվան միշտ եղել է և միշտ էլ կլինի շահագրգռված ուժեղ և իսկապես ինքնիշխան Հայաստանով։ Հայ ժողովուրդը մեր եղբայրական ժողովուրդն է, և մենք նրանց մաղթում ենք խաղաղություն և բարգավաճում։ Միևնույն ժամանակ, վերջին ընտրությունները հստակ ցույց տվեցին, որ հայ հասարակությունը չափազանց բևեռացված է։ Այս պայմաններում, Հայաստանի զարգացման ուղու վերաբերյալ միակողմանի որոշումներ կայացնելը՝ առանց բնակչության բոլոր շերտերի կարծիքը հաշվի առնելու, նշանակում է երկիրը տանել դեպի հետագա բաժանում և սոցիալ-տնտեսական ցնցումներ։ Մենք հույս ունենք, որ Հայաստանի իշխանությունները կառաջնորդվեն ազգային շահերի վրա հիմնված մոտեցումներով»,- Զախարովայի հայտարարության մեջ։
